کاروار میڈیا کپ 2021: کاروار واریئرز نے بھٹکل میڈیا واریئرز کو فائنل مقابلے میں دی شکست؛ بھٹکل میڈیا واریئرز کو ملا دوسرا مقام
کاروار، 12؍اپریل (ایس او نیوز)اُتر کنڑا ضلع پتر کرتا سنگھا کاروار کی طرف سے منعقد ہونے والے دس دس اووروں کے میڈیا کپ 2021 کرکٹ ٹورنامنٹ میں کاروار کی میڈیا واریئرز نے بھٹکل میڈیا واریئرز کو 8 وکٹوں سے شکست دے دی اور کپ حاصل کرنے میں کامیاب ہوگئی۔ جس کے ساتھ ہی دو روزہ ٹورنامنٹ کامیابی کے ساتھ اپنے اختتام کو پہنچا۔
اتوار کو کھیلے گئے فائنل مقابلے میں بھٹکل میڈیا واریئرز نے ٹا س جیت کر پہلے بلے بازی کرنے کا فیصلہ کیا۔ بھٹکل میڈیا واریئرز کی حالت ابتدا میں بے حد خراب رہی۔ اننگز کی پہلے اوور میں ہی بھٹکل نے 2 وکٹیں گنوائیں ۔ مگر پھر ذبیح اللہ نے شاندار اننگز کھیلتے ہوئے میچ کو نیا رُخ دیا۔ انہوں نے 3 شاندار چھکوں کی مدد سے 30 رنوں کی اننگز کھیلی اور ٹیم کا اسکور مقررہ 10 اوورز میں6 وکٹوں کے نقصان پر 92 رنز تک پہنچادیا۔
کاروار کے بلے باز جب بلے بازی کے لئے میدان میں اُترے تو یہاں بھی بھٹکل کےکھلاڑیوں نے یکے بعد دیگرے پانچ کیچس ڈراپ کردئے، جس کے نتیجے میں سلامی باز نتیش کو جارحانہ بلے بازی کرنے کے لئے اچھا حوصلہ ملا اور اس نے 44 رنز کی تیز رفتار اننگز کھیلی۔ اسی کھلاڑی کے رن کی بدولت کاروار ٹیم نے محض 7.3 اوورز میں 2وکٹیں گنوا کر جیت کے لئے درکار 93 رنز بناڈالے۔ نتیش کی جارحانہ اننگز کی بدولت انہیں مین آف دی میچ کا ایوارڈ دیا گیا۔
شاندار کھیل کا مظاہرہ پیش کرنے میں کامیاب کاروار واریئرز کو ٹورنامنٹ جیتنے پر 25000 روپیہ مع ٹرافی سے نوازا گیا۔ جبکہ ٹورنامنٹ میں دوسرا مقام حاصل کرنے والے بھٹکل میڈیا واریئرز کو15000 روپیہ مع ٹرافی دی گئی۔
ٹورنامنٹ میں کاروار واریئرز کے نتین کو اُن کے شاندار کارکردگی کی بنیاد پر بیسٹ باولر نیز پلیئر آف دی ٹورنامنٹ کے اعزاز سے نوازا گیا۔جبکہ بھٹکل میڈیا وارئیزز کے شاہد مختصر کو جس نے پورے ٹورنامنٹ میں شاندار بلے بازی کے جوہر دکھانے میں کامیاب رہے تھے بیسٹ بیٹسمین کا خطاب دیا گیا۔
فائنل تقریب میں اُتر کنڑا ڈسٹرکٹ کوآپریٹو فش مارکیٹنگ فیڈریشن کے صدر راجو ٹنڈل نے خطاب کرتے ہوئے کہا کہ صحافی اپنے صحافتی میدان میں بہت مشغول رہتے ہیں۔ اس کے باوجود دو دن تک کرکٹ کھیل میں حصہ لینا قابل تعریف ہے۔ تقریب میں موجود ایک اور مہمان بھٹکل جےڈی ایس لیڈر عنایت اللہ شابندری نے اپنے خطاب میں کہا کہ کھیلوں سے ہی آپس میں پیار ، محبت اور خیر سگالی کا جذبہ پیدا ہوتاہے۔انہوں نے صحافیوں کو مشورہ دیا کہ جس طرح آپ لوگوں نےکرکٹ ٹورنامنٹ کے ذریعے بھائی چارگی پیغام دیا اور آپس میں جس طرح مل جل کر کھیل میں حصہ لیا، یہی جذبہ آپ رپورٹنگ کرنے کے موقع پر بھی دکھائیں اور اسی محبت کے ساتھ دوسرے فرقہ کے جذبات کا خیال رکھتےہوئے اپنے قلم کا بہترطور پراستعمال کریں۔ انہوں نے ضلع کے ہر تعلقہ میں اس طرح کے ٹورنامنٹ منعقد کرکے آپسی بھائی چارگی کو فروغ دینے پر زور دیا۔
ٹورنامنٹ میں ضلع اُترکنڑا کے مختلف تعلقہ جات سے سات ٹیموں نے حصہ لیا تھا۔ سنیچر سے جاری یہ ٹورنامنٹ اتوار شام کو اختتام کو پہنچا۔ پترکرتا سنگھا کے صدر ٹی بی ہری کانت ، نائب صدر گریش ، سکریٹری دیپک شیٹی ، رتنا کر نائک ، ساحل آن لائن کے چیف ایڈیٹر عنایت اللہ گوائی ، کاروار ٹیم کے کپتان اروند اور بھٹکل ٹیم کے کپتان پرسننا ڈائس پر موجود تھے۔