بھٹکل حنیف آباد میں راستہ کنارے کچروں کے ڈھیر میں جانوروں کے گوشت ،باقیات و دیگر فُضلہ پھینکے جانے پر عوام میں سخت ناراضگی؛ پنچایت سے کیا فوری صفائی کا مطالبہ
بھٹکل 22/جون (ایس او نیوز) تعلقہ کے ہیبلے گرام پنچایت حدود کے حنیف آباد میں راستہ کنارے کچروں کے ڈھیر کے درمیان اب خراب اور سڑے ہوئے گوشت کی تھیلیاں پائی جانے کے بعد عوام میں سخت ناراضگی پائی جارہی ہے۔ عوام نے ہیبلے پنچایت سے مطالبہ کیا ہے کہ وہ فوری علاقہ سے کچروں کا ڈھیر اُٹھائے اور اُسے ٹھکانے لگائیں ، علاقہ کے عوام نے متنبہ کیا ہے کہ پنچایت کی طرف سے فوری کاروائی نہیں کی گئی تو وہ احتجاج پر اُتر آئیں گے۔
مقامی لوگوں کا کہنا ہے کہ عید کے موقع پر تمام کچروں کو اُٹھایا گیا تھا اور علاقہ کو صاف کیا گیا تھا، مگر اس کے دو روز بعد ہی لوگوں نے پھر سے راستہ کنارے کچرا پھینکنا شروع کردیا، ایسے میں اب ان کچروں میں کوئی گوشت اور دیگر جانوروں کے باقیات، فُضلہ وغیرہ لاکر پھینک رہا ہے ، گوشت سڑنے کی وجہ سے پورے علاقہ میں خطرناک تعفن اور بدبو پھیل گئی ہے۔ یہاں کے مکینوں نے بتایا کہ پہلے گوشت اور اوجھڑی سے بھری ایک بیگ نظر آئی تھی، اب دو چار دنوں میں یہاں آٹھ بیگ نظر آرہی ہیں اور ان تھیلوں میں گوشت ایسا سڑ چکا ہے کہ اس کی بدبو سے راستے سے گذرنا محال ہوگیا ہے۔
حنیف آباد چونکہ ایک رہائشی علاقہ ہے ، یہاں کے راستہ کنارے پر کچروں کے ڈھیر اور اب گائے کی اوجھڑی اور سڑے ہوئے گوشت پائے جانے سے نہ صرف پورا علاقہ بدبو دار ہوگیا ہے، بلکہ علاقہ میں مکھیوں اور مچھروں کی بھی بہتات ہوگئی ہے۔ ایسے میں بارش کی شروعات کے ساتھ ہی طبی ماہرین نے خدشہ ظاہر کیا ہے کہ بارش کے نتیجے میں یہاں وبائی امراض پھوٹ سکتے ہیں جس سے خاص طور پر بچوں کی بڑی تعداد متاثر ہوسکتی ہے۔
علاقہ کی حنیف آباد ویلفیر اسوسی ایشن کے ایک ذمہ دار نے بتایا کہ اب یہاں کچروں کو پھینکنا ہم برداشت نہیں کریں گے، خاص کر ہمیں اگر معلوم ہوگیا کہ یہاں گوشت کے تھیلے کون لاکر پھینک رہا ہے، تو پھر اُس کی خیر نہیں ہے۔ ویلفئیر اسوسی ایشن کی جانب سے اس تعلق سے پولس تھانہ میں بھی معاملہ درج کرنے کی باتیں ہورہی ہیں۔
