وجئے پور،12/مئی (ایس او نیوز/رفیع بھنڈاری) ریاست میں کورونا وباء سے نمٹنے میں ایڈی یورپا کی بی جے پی حکومت مکمل ناکام ہوچکی ہے۔سابق ریاستی وزیر و مقامی بی ایل ڈی ای میڈیکل کالج کے سربراہ ایم بی پاٹل نے آج یہاں ایک اخباری کانفرنس کو خطاب کرتے ہوئے ڈنکے کی چوٹ پر یہ بات بتائی۔

انہو ں نے کہاکہ اس طرح ریاستی حکومت ہر میدان میں ناکامی کامنہ دیکھ رہی ہے۔ایک جانب کسانوں کو اگائی گئی فصل کی قیمت نہیں مل رہی ہے تو دوسری طرف بے روزگاری، بے کاری بڑھ گئی ہے۔ صنعتیں بند پڑی ہیں۔جس کے سبب ریاست میں خوشحالی اور ترقی نام کو بھی نہیں ہے۔

پاٹل نے بتایا کہ اس طرح کے حالات میں قدرت کی جانب سے قہر کورونا کی شکل میں رونما ہوا ہے۔جس سے نمٹا جاسکتا ہے مگر ریاستی حکومت کے پاس کوئی منظم پلان نہیں ہے۔کورونا متاثرین کے لئے ریمڈیسیور انجکشن مہیا کرانے میں وہ بری طرح ناکام ہے۔ ریاستی حکومت اس ضمن میں کوئی موثر اقدام کرنے تیار نہیں بلکہ اس معاملے میں تعصب سے بھی کام لیا جارہا ہے۔

انہوں نے کہا کہ ہمارے بی ایل ڈی ای اسپتال میں داخل شدہ کووڈ مریضوں کو بیڈ اور انجکشن معقول شرح پر مہیا کرنے کے باوجود حکومت کی جانب سے انجکشن زیادہ سے زیادہ مقدار میں مریضوں کے تناسب سے ملنا مشکل ہوگیاہے۔انہوں نے سوال کیا کہ کیوں ہم ہمارے نجی اسپتال میں رسک لے کراتنا کام کریں جبکہ حکومت کا کوئی ہمیں تعاون نہیں ہے۔انہوں نے دہرایا کہ سارے ہندوستان کے سرکاری اور نجی اسپتالوں کے مقابلے بی ایل ڈی ای میڈیکل کالج اسپتال میں کووڈ کے مریضوں کو نہایت کم شرح پر علاج کیا جارہا ہے اور 7سو بیڈکووڈ متاثرین کے لئے مختص کئے گئے ہیں۔

دریں اثناء  یہاں بی ایل ڈی ای میڈیکل کالج اسپتال میں اے ایس پاٹل کامرس کالج کے سابق طلبہ کے انجمن کی جانب سے کورونا سے متاثرہ مریضوں کیلئے مفت کھانا مہیا کیا گیا۔