بھٹکل 2 اپریل (ایس او نیوز) بھٹکل کے معروف عالم دین  مولانا عبدالرب  خطیبی  ندوی،  جماعت المسلمین بھٹکل کے قاضی مقرر کئے گئے ہیں، اس بات کا اعلان  جماعت المسلمین بھٹکل کے صدر جناب جان عبدالرحمن محتشم نے کیا۔  نماز جمعہ  کے فوری بعد  جامع مسجد میں منعقدہ مختصر تقریب  میں نئے قاضی صاحب  کا اعلان کیا گیا۔

58 سالہ مولانا عبدالرب ندوی  کے والد محمد احمد خطیبی بھی چیف قاضی تھے۔ مولانا عبدالرب ندوی  25 سالوں سے بھی زائد عرصہ سے  جماعت المسلمین بھٹکل کے نائب قاضی  کے عہدہ پر فائز تھے۔ آپ نے جامعہ اسلامیہ کے شعبہ عالمیت سے فرا غت کے بعد دارالعلوم ندوۃ العلماء میں شعبہ حدیث میں تخصص کیا تھا اور وہیں سے فضیلت کی سند بھی حاصل کی تھی، آپ کئی سالوں سے جامعہ اسلامیہ بھٹکل میں تدریسی خدمات بھی انجام دے رہے ہیں، حدیث و فقہ  و ادب کے بڑے اساتذہ میں شمار ہوتے ہیں ۔

یاد رہے کہ قریب آٹھ ماہ قبل  قاضی مولانامحمد اقبال مُلّا ندوی کے انتقال کے بعد  نئے قاضی کا تقرر ہونا  باقی تھا، گذشتہ  دنوں جماعت المسلمین بھٹکل   میں منعقدہ میٹنگ میں  مولانا عبدالرب خطیب ندوی کا انتخاب عمل میں آیاتھا، آج جمعہ کو  ان کے نام کا اعلان کیا گیا۔

مولانا عبدالرب خطیب ندوی  صاحب قاضی مقرر ہونے پر مختلف اداروں کے ذمہ داران  کی طرف سے  اُنہیں مبارکباد ی کے پیغامات پیش کئے جارہے ہیں،  مرکزی خلیفہ جماعت المسلمین بھٹکل  کے قاضی مولانا خواجہ معین الدین اکرمی مدنی نے  بھی  انہیں مبارکباد پیش کی ہے۔