نئی دہلی،2؍مئی (ایس او نیوز؍آئی این ایس انڈیا) دہلی کی ایک عدالت نے جنوبی افریقہ کے سابق کپتان ہینسی کرونیے سے منسلک کرکٹ کے سب سے بڑے میچ فکسنگ معاملے میں سے ایک میں اہم ملزم سنجیو چاولہ کو ضمانت دے دی ہے۔

خصوصی جج اشوتوش کمار نے چاولہ کو دو لاکھ روپے کے ذاتی مچلکے اور اتنی ہی رقم کی دو ضمانت کے ساتھ 30 اپریل کو راحت دی۔عدالت نے کہا کہ ملزم گزشتہ 76 دنوں سے حراست میں ہے اور معاملے میں جانچ پہلے ہی مکمل ہو گئی ہے۔

پولیس کے مطابق چاولہ کو فروری میں لندن سے حوالگی کرکے لایا گیا تھا اور وہ پانچ میچوں کی فکسنگ میں ملوث ہے۔پولیس نے عدالت کو بتایا تھا کہ کرونیے بھی اس معاملے میں شامل تھا۔ کرونیے کی 2002 میں طیارہ حادثے میں موت ہو گئی تھی۔

ایسا الزام ہے کہ چاولہ نے فروری مارچ 2000 میں جنوبی افریقہ کی ٹیم کے ہندوستان دورے کے میچوں کو فکس کرنے کے لئے کرونیے کے ساتھ سازش کرنے میں اہم کردار ادا کیا تھا۔

برطانیہ کی عدالت کے دستاویزات میں کہا گیا ہے کہ چاولہ کی پیدائش دہلی میں ہوئی اور وہ ایک کاروباری ہے جو 1996 میں کاروباری ویزا پر برطانیہ آیا تھا لیکن مسلسل ہندوستان کا دورہ کرتا رہا۔