بنگلورو، 19؍جون(ایس او  نیوز)ریاستی حکومت کی طرف سے تعلیمی نصاب میں تبدیلی کے مرحلہ میں ملک اورریاست کی ممتاز شخصیات کے تذکرے سے حذف کئے جانے اور اس نصاب کی ترتیب دینے والے روہت چکر ورتی کے خلاف کارروائی کا مطالبہ کرتے ہوئے شہر کے فریڈم پارک میں وشوا کرانتی کاری مہا کوی کویمپو ہوراٹا سمیٹی کی جانب سے بہت بڑا احتجاجی مظاہرہ کیا گیا جس میں سابق وزیر اعظم ایچ ڈی دیوے گوڑا اور کرناٹک پردیش کانگریس کمیٹی صدر ڈی کے شیو کمار اور مختلف مٹھوں کے سربراہوں نے شرکت کر کے دانشوروں کی طرف سے کئے جا رہے اس احتجاج کے لئے اپنی حمایت کا اعلان کیا۔

سیاسی امتیازات سے بالاتر ہو کر قائدین اور مٹھوں کے سربراہوں نے احتجاج میں حصہ لیا اور حکومت کی طرف سے نصاب بدلنے کی آڑ میں جس طرح کی عصبیت معاشرے میں پھیلانے کی کوشش کی جا رہی ہے۔اس احتجاج میں حکومت سے مانگ کی گئی کہ نظرثانی شدہ نصاب کو فوری طور پر واپس لیا جائے۔اس احتجاج سے قبل اس میں شامل شخصیتوں نے بڑی تعداد میں سنگولی رائنا سرکل سے فریڈم پارک تک ریلی نکالی ۔فریڈم پارک میں نامور کنڑا ادیب اور ریاستی تعلیمی نصاب کمیٹی کے سابق چیر مین پروفیسر برگور رام چندرپا نے آئین کا ابتدائیہ پڑھا۔

اس احتجاج میں سابق وزیر اعظم ایچ ڈی دیوے گوڑا اور کے پی سی سی صدرڈی کے شیو کمار کے علاوہ سپریم کورٹ کے وظیفہ یاب جج جسٹس گوپال گوڑا، فلم اداکار مکھیہ منتری چندرو،سینئر وکیل سی ایچ ہنومنتیا، ریاستی جنتا دل(ایس) صدر سی ایم ابراہیم، ڈاکٹر راج کمار ابھیمانی سنگھا کے صدر سارا گووند،کے پی سی سی کے کارگزار صدر رام لنگا ریڈی،سابق وزیر ایم کرشنپا، ماولی شنکر، مختلف مزدور تنظیموں کے سربراہوں اور دیگر قائدین نے شرکت کر کے ریاستی حکومت کی طرف سے تعلیمی نصاب میں زعفرانیت لانے حکومت کی کوششوں کی سخت انفاظ میں مذمت کی۔اس احتجاج میں شامل رہنماؤں نے کہا کہ روہت چکرورتی نے ریاست کے ترانے کی توہین کی ہے لیکن اس کے باوجود حکومت نے ان کے خلاف کوئی کارروائی نہیں کی۔ان لوگوں نے کہا کہ برگور رام چندرپا نے جونصاب ترتیب دیا اس کو برقرار رکھا جائے۔

نصاب سے حکومت نے کویمپو، گوتم بدھ، مہاویر، بسونا، والمیکی، سواتری بائی پھولے، پیریاررام سوامی، نارائین گرو،سنگولی رائنا، سرپور نائک،اکا مہادیوی، ٹیپو سلطان، با با صاحب امبیڈکر، آدی چنچن گری بال گنگا دھر ناتھ سوامی سمیت بہت ساری ہستیوں کے وقار کو نصاب کے ذریعے مجروح کرنے کی کوشش کی ہے۔ اس احتجاج میں دیوے گوڑا اور ڈی کے شیو کمار نے نقارہ بجا کر تحریک کی شروعات کا اعلان کیا۔ بڑی تعداد میں علماء، دیگر مذاہب کے رہنماؤں ارو سماجی قائدین نے مظاہرہ میں حصہ لیا۔