کمٹہ کے دیولی دیہات میں ’’مسجد عثمانیہ‘‘ کاافتتاح
کمٹہ:26؍ستمبر(ایس اؤ نیوز)کمٹہ تعلقہ کے دیولی میں جمعرات کو جمیعۃ الحفاظ بھٹکل کے صدر مولانا نعمت اللہ عسکری ندوی کی امامت میں نمازِ ظہر ادا کرتے ہوئے ’’مسجدِ عثمانیہ ‘‘ کا افتتاح عمل میں آیا۔
افتتاحی تقریب سے بھٹکل سے تشریف فرما مہمان خصوصی مولانا محمد یونس ندوی نے مسجد کو آبادرکھنے کی اہمیت پر روشنی ڈالی اور مساجد کی تعمیر سے رحمت وبرکت نازل ہونے کی بات کہتے ہوئے مساجد کی تعمیر میں بھرپور تعاون کرنےکی اپیل کی۔ اس موقع پر مولانا محمد اقبال نائطے ندوی اور مولانا ہدایت اللہ ندوی نے بھی اپنے خیالات کااظہار کیا۔ابتداء میں مولانا نعمت اللہ عسکری ندوی کی تلاوت قرآن سے پروگرام کا آغاز ہوا تھا اور انہی کی دعا پر تقریب اختتام کو پہنچی۔ اس موقع پر مسلم و غیر مسلم کی کثیر تعداد شریک تھی۔ بھٹکل سے بھی کئی لوگ تشریف فرما تھے۔