میسور:07؍اکتوبر(ایس اؤ نیوز)مساجد کو لےکر برادران وطن کے شبہات، شکوک اور تجسس کو دورکرنے کا مقصد لےکر میسور کے ہنسور روڈ پر واقع مسجدِ مراد شاہ بی بی میں 6ستمبر 2019بروز اتوار کو ’مسجد درشن ‘‘ پروگرام منایاگیا۔متعلقہ دن سیکڑوں برادران وطن نے  صبح سے شام تک مسجد  کا   مشاہدہ کیا اور وہاں موجود ذمہ داران سے اسلام اور مسجد کے متعلق جانکاری حاصل کی۔

مسجد درشن کے تحت مسجد پہنچے برادران وطن کے مردوں، عورتوں ، عمر رسیدہ بزرگوں ، بچوں ،طلبا وطالبات اور نوجوان لڑکے لڑکیوں کو ذمہ داران نے بزبان کنڑا و انگریزی میں بتایاکہ مسجد کسی کی جائیداد نہیں ہے بلکہ یہ اللہ کا گھر ہے ، یہاں صرف اللہ کی عبادت کی جاتی ہے، یہاں ہرکوئی آکر وحدہ لاشریک کی عبادت کرسکتاہے، کسی پر کوئی پابندی نہیں ہے البتہ پاکیزگی لازمی ہوتی ہےاور اسی موقع پر پاکیزگی کے وسیع مفہوم پر بھی روشنی ڈالی گئی۔ اسی طرح مشاہدین کو مسجد کے منبر ، مصلیٰ، صف بندی ، وضوخانہ ، نماز کی ترتیب و ترکیب، نماز میں کیا پڑھا جاتاہے، رکوع، سجدہ وغیرہ کے متعلق جانکاری دی ۔ مسجد درشن کے موقع پر نمازوں کے اوقات پر باقاعدہ نماز ادا کرتے ہوئے نماز کی عملی ترکیب دیکھنے کا بھی موقع فراہم کیاگیا تھا۔   اس موقع پر جماعت اسلامی ہند کرناٹکا کے سکریٹری محمد کنہی سمیت جماعت اسلامی ہند میسور کے مقامی ذمہ داران موجود تھے۔