مرکز النوائط ابوظبی کے زیراہتمام النوائط چمپئن شپ میں امارات میں مقیم بھٹکلی کھلاڑیوں نے پیش کئے بہترین کھیل مظاہرے
دبئی 3/نومبر(ایس او نیوز) مرکز النوائط ابوظبی کے زیراہتمام ابوظبی میں بائولنگ اور ٹیبل ٹینس کے بہترین مقابلے منعقد ہوئے جس میں امارات کے مختلف شہروں میں مقیم بھٹکل کے کئی ایک کھلاڑیوں نے حصہ لیتے ہوئے نہ صرف اپنی صلاحیتوں کا لوہا منوایا بلکہ شائقین اسپورٹس کے لئے بھی بہترین تفریح فراہم کی۔
جمعہ دوپہر بعد شروع کئے گئے ان مقابلوں میں آفتاب ایم جے اور سید ادیب ایس ایم نے ٹیبل ٹینس ڈبلس میں چمپئن شپ جیتی تو سنگل ٹی ٹی میں خضر کوبٹے نے شاندار کھیل کا مظاہرہ پیش کرتے ہوئے چمپئن قرار پائے۔ ٹی ٹی ڈبلس میں خضر کوبٹے اور محمد مجتبیٰ صدیق کو رنرز آپ قرار دیا گیا، اسی طرح ٹی ٹی سنگلس میں سید ادیب ایس ایم رنرز آپ رہے۔
بائولنگ مقابلوں میں سید جاصم ایس جے، سید وقاص ایس ایم اور عون ائیکری جیت درج کرتے ہوئے النوائط چمپئن شپ کا خطاب حاصل کرنے میں کامیاب رہے۔ اسی طرح توصیف احمد خطیب، عبدالقوی موٹیا اور نہاد خطیبی رنرزآپ رہے۔
بائولنگ سنئیر درجے میں محیب اللہ سدی احمدا، ریاض ایم جے اور اشرف مصباح نے بہترین کھیل کا مظاہرہ پیش کرتے ہوئے چمپئن شپ حاصل کی اور ضیاء جوکاکو، محمد غوث خلیفہ اور یاسر معلم رنرز آپ رہے۔
بائولنگ میں جملہ 39 کھلاڑیوں نے اور ٹیبل ٹینس میں جملہ 32 کھلاڑیوں نے حصہ لیا۔ ابوظبی کے ساتھ ساتھ دبئی سے بھی کافی کھلاڑی ان مقابلوں میں شریک رہے۔
مرکز النوائط ابوظبی کے صدر جناب عبدالحسیب کاڈلی، جنرل سکریٹری محیب اللہ سدی احمدا، سرپرست محمد فاروق مصباح، سکریٹری عاطف اُدیاور، محاسب اشرف کولا، دبئی سے تشریف فرما مرکز النوائط ابوظبی کے سابق جنرل سکریٹری و دبئی جماعت کے جنرل سکریٹری محمد یوسف برماور، دبئی جماعت کے سکریٹری جیلانی محتشم، نائب صدر مُعیض معلم اور بھٹکل مسلم خلیج کونسل کے سابق جنرل سکریٹری ڈاکٹر خواجہ اویس سمیت کافی دیگر ذمہ داران کے ہاتھوں کھلاڑیوں کو میڈلس، انعامات نیز ٹرافی سے نوازا گیا۔ شروع سے لے کر آخر تک میچس سے لطف اندوز ہونے کے لئے کافی لوگ موجود تھے۔
