الال میں ایودھیا فیصلے کے خلاف پمفلیٹ کی تقسیم۔ 2 نوجوان گرفتار
منگلورو 17/نومبر (ایس او نیوز)الال کے قریب کوڈی میں ایودھیامعاملے پر سپریم کورٹ کے تازہ فیصلے کے خلاف اشتہاری پرچے (پمفیلٹ) تقسیم کرنے کے الزام میں پولیس نے2 نوجوانوں کو گرفتار کرلیا ہے۔
الال پولیس کے ذریعے جمعہ کے دن دیر رات گئے گرفتار ہونے والے ملزمین کے نام سنان(21سال) اور حکیم (26سال) بتائے گئے ہیں جو کہ کے سی روڈ کے رہنے والے اورایس ڈی پی آئی کارکنا ن ہیں۔ان لوگوں پر الزام ہے کہ انہوں نے ایسے پرچے عوام میں تقسیم کیے جس میں کہاگیا ہے کہ بابری مسجدکے معاملے میں سپریم کورٹ کے فیصلے سے مسلمانوں کے ساتھ ناانصافی ہوئی ہے۔ یہ پرچے عوامی مقامات پر دیواروں پر چسپاں کرنے کابھی الزام ہے۔اس تعلق سے عوام کی جانب سے خبر دئے جانے پرپولیس نے ان کو گرفتار کرلیا اور ان کے پاس موجود پمفلیٹس بھی ضبط کرلیے۔
گرفتار شدہ ملزمین کو عدالت میں پیش کیا گیا۔ معلوم ہوا ہے کہ الال پولیس اسٹیشن کے سامنے ایس ڈی پی آئی کے اراکین نے اس گرفتاری کے خلاف احتجاجی مظاہرا بھی کیا۔حالات کو قابو میں رکھنے کے لئے پولیس نے ریپڈ ایکشن فورس اور کے ایس آر پی کی ٹکڑیوں کو تعینات کردیا ہے۔