منگلورو: گئو رکھشا کے مقصد سے بجرنگ دل سڑکوں پر اترنے کے لئے تیار؛کٹر ہندوتواوادی لیڈر شرن پمپ ویل نے ضلعی انتظامیہ کو دی وارننگ
منگلورو،7؍اکتوبر(ایس او نیوز) وشوا ہندوپریشد کےریجنل سیکریٹری اور کٹر ہندوتواوادی لیڈر شرن پمپ ویل نے ایک اخباری کانفرنس کے ذریعے اعلان کیا ہے کہ اگرضلع انتظامیہ نے گئو کشی،گئوچوری اور غیر قانونی رفت پر پابندی نہیں لگائی تو بجرنگ دل کے کارکنان ہندوؤں کے لئے بڑی تقدیس کا درجہ رکھنے والی گائے کی حفاظت کے لئےسڑکوں پر اتر آئیں گے۔
شرن نے کہا کہ غیر قانونی طور پر بے رحمانہ انداز میں گائیں قصائی خانے میں لے جانا ہندوؤں کے جذبات بھڑکانے کا کام ہے جو بڑی منصوبہ بندی کے ساتھ کیا جارہا ہے۔ اس کے علاوہ مختلف مقامات پر گائے ذبح کرنے ، چوری کرنے اور غیر قانونی رفت کے پیچھے ایک بڑا مافیا کام کررہا ہے۔ پولیس اور حکومت کو اس کاپردہ فاش کرنا چاہیے۔
شرن پمپ ویل نے تنبیہ کرتے ہوئے کہا کہ اگر سرکاری طور پر گئو کشی اور گئو چوری کی وارداتوں پر روک نہیں لگائی گئی تو بجرنگ دل کارکنان احتجاج کرتے ہوئے سڑکوں پر اتریں گے ۔ پھر اس کے بعد جو حالات ہونگے اس کے لئے ضلع انتظامیہ ہی پوری طرح ذمہ دار ہوگی۔
پریس کانفرنس کے موقع پر بجرنگ دل ریجنل کنوینر بھوجنگ کولال ، ڈسڑکٹ سیکریٹری شیوا نند مینڈن، ڈسٹرکٹ نائب صدر منوہر سوورنا، پردیپ پمپ ویل اور گروپرساد الال وغیرہ موجود تھے۔