منگلورو 15/اگست (ایس او نیوز)جنوبی کینرا کے ڈپٹی کمشنر سسی کانت سینتھل نے جنوبی کینرا اور چکمگلورو کو جوڑنے والی چارمڈی گھاٹ کے سڑک پر 15اگست سے ایک مہینے تک کے لئے موٹر گاڑیوں کی آمد و رفت پر پابندی لگادی ہے۔

ڈی سی نے اس پابندی کو موٹر وھیکلس ایکٹ 1988کی دفعہ 115اوررُول(221A(5کے تحت 14اگست کی آدھی رات سے لاگو کرنے کا حکم جاری کردیا ہے۔اب اس پابندی کے بعد چارمڈی گھاٹ سے گزرنے والی ٹریفک کو اوجیرے سے دھرمستھلا۔ کوکّاڈا، گونڈیا۔ شیرڈی (نیشنل ہائی وے 75) اور موڈیگیرے ہینڈپوسٹ سے جینّا پورا۔آانے محل، شیرڈی۔ گونڈیا کے راستے پر موڑ دیا گیا ہے۔

یاد رہے کہ منگلورو۔ ویلّاپورم نیشنل ہائی وے73 پرچارمڈی گھاٹ روڈکے علاقے میں 8اگست سے بہت ہی زیادہ برسات ہورہی ہے۔10اگست کو طوفانی ہواؤں اور موسلادھار بارش ہونے کی وجہ سے گھاٹ کے مختلف حصوں میں زمین کھسکنے اور درختوں کے اکھڑنے کا واقعہ پیش آیا تھا۔روڈ کی بگڑی ہوئی حالت کا جائزہ لینے کے بعد نیشنل ہائی وے اتھاریٹی منگلورو ڈیویژن کے ایکزیکٹیو انجینئر نے ڈی سی کو درخواست دی تھی کہ اس علاقے میں چونکہ سفر کرنے والوں کے لئے حادثات کا خدشہ بنا ہوا ہے اور سڑک کی مرمت کا کام بھی صحیح طریقے سے انجام دینا ضروری ہے اس لئے ٹریفک پر پابندی لگادی جائے۔ایکزیکٹیو انجینئر کی درخواست کا جائزہ لینے کے بعد ڈپٹی کمشنرنے چارمڈی گھاٹ کے علاقے میں مسافروں کے تحفظ کو یقینی بنانے کے لئے موٹر گاڑیوں کی نقل و حرکت پر ایک مہینے تک کی پابندی عائد کردی ہے۔