منگلورو: جعلی کرنسی چھاپنے اور بازار میں چلانے والے دو ملزمین گرفتار
منگلورو28/فروری (ایس او نیوز) بجپے پولیس اسٹیشن کے افسرا ن نے جعلی نوٹ چھاپنے اور اسے بازار میں چلانے کی کوشش کرنے والے دو ملزمین کو گرفتار کیا ہے اور ان کے قبضے سے جعلی نوٹ، کلر پرنٹر، موبائل فونس اور موٹر سائیکل ضبط کرلیے گئے ہیں۔
ذرائع سے ملی اطلاع کے مطابق گرفتار شدہ ملزمین کے نام دھیریندرا(45سال) اور سدھیر پجاری (44سال) بتائے گئے ہیں۔ ان کے پاس سے 500روپے کی قیمت والے 3نوٹ اور200روپے کی قیمت والے 7نوٹ برآمد کیے گئے ہیں۔
بتایاجاتا ہے کہ دونوں ملزمین نے موٹر سائیکل پر سوار ہوکر عبدالسلام نامی شخص کی چھوٹی سی دکان پر پہنچ کر20روپے کی قیمت والا ریزر بلیڈ خریدنے کے بعددو سوروپے کا نوٹ دیا اور ریزگاری 180روپے لے کر وہاں سے نکل گئے۔ عبدالسلام کو نوٹ پر کچھ شک ہواتھا وہ ان دونوں کو تلاش کرنے باہر آگیا تب تک وہ محمد عارف نامی دوسرے شخص کی دکان سے سرسوں کے بیج خرید کر وہاں بھی دو سو روپے کا نوٹ پیش کرچکے تھے۔ عارف کو بھی اس نوٹ پر شک ہوا اور عبدالسلام نے بھی وہاں پہنچ کر ان سے سوال کرنا شروع کیا تو وہ دونوں دکاندار کے ہاتھ سے نوٹ چھین کر فرار ہوگئے۔ اس کے بعد عبدالسلام اور عارف نے بجپے پولیس اسٹیشن میں شکایت درج کروائی جس پر کارروائی کرتے ہوئے ملزمین کو گرفتار کرلیا گیا۔