جنوبی کینرا میں سامنے آئے بلیک فنگس کے 12 معاملے ۔ 2 مریض ہوگئے فوت
منگلورو، 24؍ مئی (ایس او نیوز) جنوبی کینرا ضلع انتظامیہ اور محکمہ صحت کے لئے کووڈ کے ساتھ بیلک فنگس انفیکشن مزید درد سر کا سبب بن گیا ہے۔
ڈی ایچ او ڈاکٹر کشور کمار کے مطابق 15 مریضوں میں بلیک فنگس کی نشاندہی کی گئی اور جانچ کے بعد اب تک ان میں سے 12 مریضوں میں بلیک فنگس انفیکشن کی تصدیق ہوگئی ہے جبکہ بقیہ 3 کو ابھی مشتبہ مریضوں میں رکھا گیا ہے اور ان کی صحت پر گہری نظر رکھی گئی ہے۔ اس کے علاوہ ضلع میں اب تک دو مریض بلیک فنگس کی وجہ سے فوت ہونے کی بات بھی سامنے آئی ہے۔
ڈی ایچ او نے واضح کیا کہ 15 بلیک فنگس معاملوں میں 6 مریضوں کا تعلق جنوبی کینرا سے ہے اور 9 دوسرے اضلاع تعلق رکھنے والے مریض ہیں۔ فوت ہونے والوں میں سے ایک مریض جنوبی کینرا اور دوسرا چترا درگہ کا رہنے والا تھا۔ انہوں نے یہ بھی بتایا کہ تا حال ضلع میں وہائٹ فنگس کا کوئی بھی کیس سامنے نہیں آیا ہے۔