منگلوروکے تلپاڈی میں جانور لے جارہے ٹرک کے ساتھ تین افراد گرفتار
منگلورو 15/جولائی (ایس او نیوز) مقامی افراد کی طرف سے الال پولیس کو اطلاع ملنے پر کارروائی کرتے ہوئے پولیس افسران نے کیرالہ سرحد سے بالکل قریب تلپاڈی کے دیوی پورامیں جانوروں سے بھرے ایک ٹرک کو روک لیا اور اس میں موجود جانوروں کوضبط کرنے کے علاوہ تین افراد کو گرفتار کرلیا جبکہ دو افراد فرار ہونے میں کامیاب ہوگئے۔
موصولہ رپورٹ کے مطابق مغربی گھاٹ کے علاقے سے کیرالہ کی طرف جارہے اس ٹرک میں 18بھینسے اور 4بھینسیں تھیں۔پولیس نے جب ٹرک کوروکنے کی کوشش کی تو ٹرک پر سوار دو افراد فرار ہوگئے جبکہ ٹرک کے کیبن میں موجود تین لوگوں کو گرفتار کرلیا گیا ہے جن کی شناخت ہاسن ضلع کے رہنے والے چندے گوڈا اور رویندرا کے علاوہ کاسرگوڈ کے رہنے والے فاروق کے طور پر کی گئی ہے۔
پولیس کا کہنا ہے کہ ایک کنٹینر ٹرک میں 22جانوروں کو بہت ہی ظالمانہ انداز میں ٹھونس کر لے جایا جارہاتھا۔اس لئے جانوروں کو ضبط کرکے پاجیرومیں واقع مویشیوں کے باڑے میں بھیج دیاگیا ہے۔ الال پولیس نے کیس درج کرلینے کے بعد مفرور ملزمین کی گرفتاری کے لئے جال بچھادیا ہے۔