منگلوروآنے والی ایئر انڈیا فلائٹ کے مسافروں کودبئی ایئر پورٹ پر کرناپڑا گھنٹوں انتظار
منگلورو28؍مارچ (ایس او نیوز) ایئر انڈیا ایکسپریس کی فلائٹ جو دبئی سے منگلورو آنے والی تھی اس کے اڑان بھرنے میں تقریباً6گھنٹوں کی تاخیر سے مسافروں کو دبئی ایئر پورٹ پر پریشانی کا سامنا کرناپڑاجس کے خلاف مسافروں نے اپنی برہمی کا اظہار کیا ہے۔
دبئی ایئر پورٹ سے اس طیارے کو منگلورو کے لئے بدھ کی رات میں11.40بجے اڑان بھرنی تھی۔ مسافروں کا کہنا ہے کہ طیارے کے پائلیٹس نے ایئر پورٹ پہنچنے میں گھنٹوں کی تاخیر کردی اور مسافرطیارے کے اندر ہی لمبے انتظارسے تنگ آکر ایئر انڈیا ایکسپریس کی انتظامیہ اور طیارے کے عملے کے خلاف اپنی ناراضی کا اظہار کرنے پر مجبور ہوگئے۔بتایاجاتا ہے کہ مسافروں کو طیارے سے اتار کر کسی دوسری جگہ بٹھانے اور انہیں راحت پہنچانے کا کوئی متبادل انتظام بھی نہیں کیا گیاتھا۔کافی گرما گرمی اور بحث و تکرار کے بعد یہ طیارہ صبح 5.30بجے دبئی سے روانہ ہوا۔ ایئر انڈیا ایکسپریس کے ذرائع کے مطابق طیارے میں کچھ ٹیکنیکل خرابی پیدا ہوگئی تھی ، جسے درست کرنے میں کافی وقت لگ گیا، جبکہ مسافروں کاکہنا ہے کہ پائلیٹس نے بے پروائی اور غفلت کا مظاہرہ کیا اور مسافروں کے لئے خواہ مخواہ مشکلات کھڑی کردیں۔کیونکہ جس فلائٹ کومنگلورو ایئر پورٹ پر صبح 4.30بجے اترنا تھا وہ نئے شیڈول کے مطابق صبح 10.30بجے منگلورو پہنچ گئی تھی۔
