منگلورو،25 ؍اکتوبر (ایس او نیوز) سڑک پر سفر کے دوران موٹر بائک سواروں اور بس کنڈکٹر کے درمیان تکرار کے بعد بس پر سنگ باری کرکے فرار ہونے کے الزام میں ایک شخص کوگرفتا ر کیا ہے جبکہ پولیس کو کارروائی سے روکنے کے الزام میں دو افراد گرفتار کرلیے گئے ہیں۔ سنگ باری کا ایک اور ملزم فرار ہونے میں کامیاب ہوا ہے جس کی تلاش جاری ہے۔
موصولہ رپورٹ کے مطابق یہ واقعہ وٹّل سے منگلورو کی طرف سفر کے دوران پیش آیا تھا۔ اوور ٹیک کرنے کے معاملے پر ایک موٹر بائک پر سوار دو لوگوں اور بس ڈرائیور کے درمیان تکرارشروع ہوگئی جس کے بعد موٹر بائک سواروں نے ڈیرلکٹّا کے پاس بس پر پتھر پھینکے۔ ایک پتھر ڈرائیور کی کنپٹی کو زخمی کردیا اور بس کے سامنے والے شیشے سے ٹکراکر اسے چور چور کردیا ۔ چونکہ اس وقت بس مسافروں سے بھری ہوئی تھی اس لئے ڈرائیور سا بھی بے قابو ہوجاتا تو پھر بہت بڑا حادثہ ہوسکتا تھا۔ ڈرائیور کو زخمی اور بس کے شیشے کو نقصان پہنچانے کے بعد دونوں بائک سوار موقع پر سے فرار ہوگئے تھے۔
کوناجے پولیس نے معاملہ درج کرلینے کے بعد جائے وقوع سے قریب موجود سی سی کیمرے کی مدد سے ملزمین کی شناخت کرلی اور افضل نامی ملزم کو گرفتار کرلیا جبکہ دوسرا ملزم پونگا اشرف فرار ہوگیا ہے۔ افضل کو گرفتارہونے سے بچانے کے لئے ایک ہجوم نے پولیس کو روکنے کی کوشش کی تھی جس کے بعد پولیس نے اپنی کارروائی میں رکاوٹ ڈالنے کے الزام میں مزید دو افراد کو گرفتار کرلیا ہے۔