منگلورو ایئر پورٹ پر33لاکھ روپے مالیت کا سونا اسمگلنگ کی کوشش ناکام۔ 2ملزمین گرفتار
منگلورو 29/جولائی (ایس او نیوز)منگلورو انٹر نیشنل ایئر پورٹ پر کسٹم افسران نے سونا اسمگلنگ کرنے کی کوشش ناکام بناتے ہوئے2مسافرو ں کے قبضے سے 971.59گرام 24 قیراط کا سوناضبط کرلیا ہے جس کی مجموعی مالیت 33لاکھ روپے بتائی جاتی ہے۔سونا اسمگلنگ کی کوشش کرنے والے دونوں ملزمین کو گرفتار کرلیا گیا ہے۔
موصولہ رپورٹ کے مطابق دونوں مسافروں نے دبئی سے منگلورو تک سفر کیا تھااور اس دوران انہوں نے یہ سونا پیسٹ کی شکل میں اپنے مقعد میں چھپا کر رکھا تھا۔کسٹمز افسران کا کہنا ہے کہ ملزمین سے پوچھ تاچھ کے دوران پتہ چلاہے کہ انہوں نے سونا اسمگلنگ کرنے کی کوشش پہلی بار کی تھی۔ایک مسافر کے بارے میں معلوم ہوا ہے کہ وہ کومبلے کا رہنے والا ہے جس کے پاس22.82روپے مالیت کا 652گرام سونے کا پیسٹ موجود تھا۔جبکہ کاسرگوڈ سے تعلق رکھنے والے دوسرے مسافر کے پاس422گرام سوناتھا جس کی مالیت 11.17لاکھ روپے بتائی گئی ہے۔ان دو ملزمین میں سے ایک کو عدالتی حراست میں بھیج دیا گیا ہے۔