منگلورو 15/ اپریل (ایس او نیوز) ایئر کنڈیشنر میں شارٹ سرکیوٹ کی وجہ سے شہر اتاور علاقے میں واقع انکم ٹیکس دفتر کے ٹی ڈی ایس سیکشن میں آگ لگ گئی۔ جس کی وجہ سے وہاں خوف و ہراس کا ماحول پیدا ہوگیا۔

آشزدگی کی خبر ملنے پر ڈپٹی کمشنر آف پولیس ہری رام شنکر نے جائے وقوع پر پہنچ معائنہ کرنے کے بعد بتایا کہ صبح 9.30 بجے انکم ٹیکس دفتر سے دھواں نکلنے لگا جس کے بعد آگ بھڑک اٹھی۔ جس سے کچھ کمپیوٹر، فائلس اور الماریاں وغیرہ جل کر بھسم ہوگئیں۔ فائراور ایمرجنسی سروس فوراً حرکت میں آنے سے آگ پر جلد قابو پا لیا گیا اور کسی کو بھی کوئی جسمانی نقصان نہیں پہنچا۔

انہوں نے یہ بھی بتایا کہ حالانکہ فائلس جل کر خاک ہوگئیں، لیکن سافٹ کاپیوں کی صورت میں تمام ڈیٹا ایک مرکزی سسٹم میں محفوظ ہے۔ پولیس کمشنر ششی کمار نے بھی موقع پر پہنچ کر جائزہ لیا۔