منگلورو: ضبط شدہ لگژری کار فروخت کرنے کی تحقیقات میں پیش رفت۔ دو پولیس افسران معطل
منگلورو یکم / مارچ (ایس او نیوز) پولیس کے ذریعے ضبط کی گئی لگژری کار مبینہ طور پر پولیس افسران کی طرف سے فروخت کرنے کے معاملے میں سی آئی ڈی تحقیقات آگے بڑھ رہی ہے جس کے نتیجے میں دو پولیس افسران کو معطل کردیا گیا ہے۔
معطل شدہ پولیس افسران کی شناخت سی سی بی کے سابق سب انسپکٹر کبل راج (فی الحال چکمگلورو میں تعینات) اور اکنامک اینڈ نارکوٹکس آفینس پولیس اسٹیشن کے انسپکٹر رام کرشنا کے طور پر کی گئی ہے۔
بتایا جاتا ہے کہ مذکورہ ملزم پولیس افسران نے دھوکہ دہی معاملے میں ملوث دہلی سے تعلق رکھنے والے بعض ملزمین کے پاس سے جگوار لگژری کار ضبط کرنے کے بعد قاعدے کے مطابق اس کار کو محکمہ پولیس کے حوالے کرنے کے بجائے کسی اور شخص کو فروخت کردیا۔ سی آئی ڈی کو اب معلوم ہوا ہے کہ نومبر میں فروخت کی گئی کار کافی دنوں تک شہر میں دوڑ پھر رہی تھی۔ اس لئے اب جی پی ایس سسٹم کا سہارا لے کر اس کار کی لوکیشنس معلوم کرنے کا فیصلہ کیا گیا ہے۔ بعض معتبر ذرائع سے یہ بھی معلوم ہوا ہے کہ ایک سینئر پولیس آفیسر نے اس کار کو نہ صرف شہر میں گھومنے کے لئے استعمال کیا تھا بلکہ وہ کار اپنے گھر پر بھی لے جایا کرتا تھا۔ اس کے بعد یہ کار ایک دلال کے کمپاونڈ میں پارک کی ہوئی تھی۔ اب سی آئی ڈی کی ٹیم اس دلال سے بھی سے پوچھ تاچھ کرنے والی ہے۔
خیال رہے کہ شہر کے ایک اور تاجر کروناکر بھنڈاری نے بھی پولیس کے پاس شکایت درج کرواتے ہوئے الزام لگایا ہے کہ 25جون 2019 کو سٹی کرائم برانچ نے کرکٹ سٹہ بازی کے نام پراس کے دفتر پر چھاپہ مار کر 66لاکھ روپے ضبط کیے تھے جو کہ اس نے بینک سے لون کے طور پر حاصل کیے تھے۔ مگر اپنے ریکارڈ میں افسران نے ضبط شدہ رقم کی مقدار صرف 57.74لاکھ روپے دکھائی ہے۔