منگلورو5/فروری (ایس او نیوز) منگلورو اور اڈپی وغیرہ میں پرائیویٹ بسوں کے ڈرائیوروں او رکنڈکٹروں کے درمیان تکرار ایک عام بات ہے، لیکن آج صبح دو پرائیویٹ بس ڈرائیوروں سے بیچ سڑک پر ہی ایک دوسرے پر حملہ کردیا اور اس طرح گتھم گتھا ہوگئے کہ ن کے پیچھے دیگر موٹر گاڑیوں کا جام لگ گیا۔

بتایا جاتا ہے کہ سینٹ اگنیس کالج بونڈرویل کے سامنے کسی معمولی بات پر تکرار شروع ہوئی اور دونوں ڈرائیور بیچ سڑک پر ہی اپنی بسیں روک کر اترگئے اور ایک دوسرے پر گھونسے برسانے لگے۔ دوسری گاڑیوں کے مسافر اور ڈرائیور لمبا ٹریفک جام لگنے سے پریشان ہوگئے۔ جبکہ دونوں بسوں کے کنڈکٹروں نے محض تماشائی بنے رہنے کو ترجیح دی۔ اس دوران ایک کار کے ڈرائیور نے سڑک پر اتر کر ان دونوں کے درمیان مداخلت کی اور انہیں الگ کرکے اپنی اپنی بسوں میں جانے کے لئے کہا۔ اس طرح ایک طرف ٹریفک جام سے لوگ پریشان ہورہے تھے تو کچھ لوگ اس منظر سے لطف اٹھانے کے لئے ویڈیو کلپ بنانے میں مشغول ہوگئے تھے۔ بیچ سڑک پر مارپیٹ کا یہ منظر سوشیل میڈیا پر وائرل ہوگیا ہے۔