منگلورو،18؍مئی (ایس او نیوز) آج پیر کے دن اچانک صبح میں ہونے والی تیز بارش سے منگلورو اے پی ایم سی یارڈ میں ترکاری اور فروٹ بیچنے والوں کو بھاری نقصان ہوا ہے۔
آج یہاں پر ہفتہ واری مارکیٹ ہونے کی وجہ سے اطراف کے بیوپاریوں نے رات میں ہی ا پنا مال یارڈ میں جمع کردیا تھا۔ صبح جب اچانک بارش شروع ہوئی اور پانی تیزی کے ساتھ نالوں کی طرف بہنے لگا تو انہیں اپنا مال وہاں سے ہٹانے کا موقع بھی نہیں ملا۔ اور ترکاری اور فروٹ کی ایک بڑی مقدار پانی کے اندر بہہ گئی، جس سے ہزارو ں روپے کا نقصان ہوا ہے
خیال رہے کہ کوروناوباء پر قابو پانے کے انتظامات کے طور پر ضلع انتظامیہ نے سینٹرل مارکیٹ کے بیوپاریوں کو وہاں سے ہٹاکر پچھلے کچھ دنوں سے اے پی ایم سی یارڈ میں منتقل کیا ہے۔ ان بیوپاریوں نے کہا کہ ہم لوگ عوامی صحت کا مسئلہ دیکھتے ہوئے یہاں منتقل ہوگئے تھے، مگر ضلع انتظامیہ نے اس کے بعد ہماری کوئی خبر نہیں لی اور بنیادی سہولتیں فراہم کرنے کی طر ف کوئی توجہ نہیں دی۔ آج جو بارش ہوئی ہے اس سے ضلع انتظامیہ کو جاگ جانا چاہیے اوربرسات کا موسم باقاعدہ شروع ہونے سے پہلے ہی ہمارے لئے ضروری سہولتیں مہیا کرنا چاہیے۔