منگلورو: سورتکل ٹول پلازہ پر بند نہیں ہوئی ٹول وصولی - ہیجماڈی گیٹ پر ٹول فیس میں اضافہ کا امکان - احتجاجی دھرنا جاری
منگلورو 16/ نومبر (ایس او نیوز) رکن پارلیمان نلین کمار کٹیل نے حالانکہ 11 نومبر کو ٹویٹ کرتے ہوئے بتایا تھا کہ مرکزی حکومت نے سورتکل ٹول گیٹ کو بند کرنے کا فیصلہ کیا ہے اور اس کے لئے انہوں نے وزیر اعظم نریندرمودی اور مرکزی وزیر نتین گڈکری کا شکریہ بھی ادا کیا تھا ۔ مگر سچائی یہ ہے کہ سورتکل ٹول پلازہ پر ابھی تک ٹول وصولی بند نہیں ہوئی ہے ۔
احتجاج جاری رہے گا: دوسری طرف ٹول گیٹ مخالف سمیتی کی جانب سے سورتکل گیٹ کے پاس دن رات چل رہا احتجاجی دھرنا جاری ہے جو 20 ویں دن میں داخل ہو چکا ہے۔ دھرنے کی قیادت کر رہے منیر کاٹیپلا نے کہا کہ ٹول گیٹ ہٹانے کا جو موقف احتجاجی کمیٹی نے اختیار کیا ہے اسے تُلو ناڈو کے عوام نے زبردست حمایت دی ہے۔
اس مطالبہ سے پیچھے ہٹنے کا کوئی سوال ہی نہیں ہے۔ جب تک اس گیٹ پر ٹول وصولی بند نہیں ہوتی تب تک یہ احتجاج جاری رہے گا ۔
نلین کمار نے کی جلد بازی: منیر کاٹیپلا نے کہا کہ نلین کمار نے جس عجلت سے ٹویٹ کرتے ہوئے بتایا تھا کہ سورتکل گیٹ منسوخ کردی گئی ہے اور وہاں پر ٹول وصولی بند ہوئی ہے، وہ گزٹ نوٹی فکیشن میں دکھائی نہیں دے رہی ہے اور اس پر عمل در آمد نہیں ہو رہا ہے۔ جس رکن پارلیمان نے غیر مجاز طریقے پر سیکڑوں کروڑ روپے وصول کرنے میں تعاون کیا تھا وہی شخص وصولی بند کرنے کے لئے حکومت کا شکریہ ادا کر رہا ہے ۔ ٹول پلازہ بند کروانے کا کریڈٹ لینے کے لئے بی جے پی لیڈروں کے درمیان دوڑ لگی ہوئی ہے۔
ہیجماڈی گیٹ پر ٹول میں اضافہ ؟: سمجھا جا رہا ہے کہ سورتکل میں گیٹ ہٹنے سے حکومت کا کوئی نقصان اور عوام کا کوئی فائدہ ہونے والا نہیں ہے، کیونکہ سرکاری طور پر ہیجماڈی ٹول گیٹ پر ٹول فیس میں اضافہ کرنے اور موٹر گاڑیوں سے اب وہاں دوہرا ٹول وصول کرنے کے امکانات ہیں ۔ اس کے علاوہ سورتکل میں KA19 رجسٹریشن والی جن گاڑیوں کو ٹول ٹیکس میں چھوٹ ملتی تھی وہ بھی ختم ہوجائے گی ۔ جس کا مطلب یہ ہوا کہ عوام 'آسمان سے گرا اور کھجور میں اٹکا' والی پوزیشن میں آ گئے ہیں ۔
دو چار دن میں نوٹی فکیشن : منگلورو نارتھ کے ایم ایل اے بھرت شیٹی نے بتایا کہ مرکزی حکومت کی جانب سے سورتکل ٹول گیٹ کو ہیجماڈی گیٹ میں ضم کرنے کے بعد ریاستی حکومت کی ہدایت کے مطابق ہیجماڈی میں وصول کیے جانے والے ٹول ٹیکس کی شرح پر ضلع انتظامیہ کی طرف سے غور کیا جا رہا ہے اور ترمیم شدہ ٹول فیس کے بارے میں چند دنوں کے اندر نوٹی فکیشن جاری کیا جائے گا ۔ تب تک سورتکل گیٹ پر ٹول وصولی جاری رہے گی ۔
مرکزی وزارت کو بھیجی گئی تجویز: سورتکل میں وصولی بند ہونے پر ہیجماڈی گیٹ پر ٹول میں اضافہ کی ترمیمی تجویز کو نیشنل ہائی وے اتھاریٹی آف انڈیا کے ریجنل آفس سے مرکزی وزارت برائے لینڈ ٹرانسپورٹ اینڈ ہائی ویز کو بھیجا گیا ہے ۔ اس میں مختلف موٹر گاڑیوں کے لئے ٹول کی شرح میں ترمیم شدہ اضافہ تجویز کیا گیا ہے اور اس کے لئے مرکزی وزارت سے توثیق طلب کی گئی ہے ۔ بتایا گیا ہے کہ دہلی سے منظوری اور توثیق ملنے کے بعد ریاستی حکومت یا جنوبی کینرا ڈپٹی کمشنر کی طرف سے سورتکل گیٹ بند کرنے کا نوٹی فکیشن جاری کیا جائے گا ۔ معلوم ہوا ہے کہ ڈپٹی کمشنر روی کمار نے این ایچ اے آئی کے افسران کے ساتھ کل ایک میٹنگ منعقد کی اور اس معاملہ پر تفصیلی گفتگو کی ہے ۔
ہیجماڈی میں بھی ہوگا احتجاج : سورتکل ٹول مخالف سمیتی کے کنوینر منیر کاٹیپلا نے بتایا کہ سورتکل گیٹ پر وصولی بند ہونے کے بعد ہیجماڈی گیٹ پر ٹول فیس میں اگر حد سے زیادہ اضافہ کیا گیا تو وہاں بھی احتجاجی جدوجہد تیز ہوجائے گی ۔ یہ ایک طرح کی جبری وصولی (ایکسٹارشن) ہے۔ بی جے پی کو ایسا کوئی بھی اقدام نہیں کرنا چاہیے۔