منگلورو پولیس نے شروع کی بیرونی ممالک کی ویزا دلانے والی غیر قانونی ایجنسیوں کے خلاف کارروائی۔ 7ٹریویل ایجنسیوں پر در ج ہوئے کیس
منگلورو 29/ستمبر (ایس او نیوز) سٹی پولیس نے ان ٹریویل ایجنسیوں کے خلاف کارروائی کی ہے جو قانونی اختیارات اور اجازت نامہ نہ ہونے کے باوجود بیرونی ممالک میں ملازمتوں کے لئے ویزا فراہم کرنے کا کام کرتے ہیں۔
سٹی پولیس کمشنر ڈاکٹر پی ایس ہرشا نے بتایا کہ:”مرکزی حکومت کے خارجہ معاملات سے متعلق محکمے کی طرف سے جن ایجنسیوں کو اجازت نامہ ملا ہے، وہی بیرونی ممالک کے ویزا فراہم کرسکتے ہیں۔ مرکزی محکمہ کی اجازت کے بغیر جو ایجنسیاں یہ کام کرتی ہیں وہ غیر قانونی سرگرمی کے زمرے میں آتا ہے، اس لئے ان غیر مجاز ٹریویل ایجنسیوں کے خلاف اقدامات کرنے کے لئے محکمہ خارجہ معاملات کی طرف سے حکم جاری ہوا ہے۔ جس پرعمل پیرائی کرتے ہوئے شہر کی مختلف ٹریویل ایجنسیوں پر چھاپہ مارکر ان کے دستاویزات کی جانچ شروع کردی گئی ہے۔“
معلوم ہوا ہے کہ سنیچر کے دن شہر کے مختلف علاقوں میں چھاپہ ماری کے دوران 7ٹریویل ایجنسیاں ایسی نکلیں جن کے پاس قانونی دستاویزات موجود نہیں تھے۔ لہٰذا ان کے خلاف کیس درج کیے گئے ہیں۔
خیال ہے کہ حال ہی میں 34افراد کو ’مانکیا ایسو سی ایٹ‘ نامی شہر کی ایک ٹریویل ایجنسی کے ذریعے ملازمت کے ویزا پر کویت بھیجا گیا تھا، لیکن وہاں جانے پر ان لوگوں کو ایسے کام پر لگایا گیا جو ویزا میں درج نہیں تھا۔ اس کے علاوہ انہیں تنخواہیں بھی نہیں دی جارہی تھیں اور انتہائی مشکل حالات کا شکار ہونا پڑا تھا۔ کچھ فلاحی تنظیموں کی مداخلت کے بعد وہ لوگوں کی وطن واپسی ممکن ہوسکی تھی۔ ان 34متاثرین کے وفد نے سٹی پولیس کمشنر سے ملاقات کرکے اپنا دکھڑا سنانے کے بعد مانکیا ایسوسی ایٹ سے اپنی رقم 75ہزار روپے فی کس واپس دلوانے کا مطالبہ کیاتھا جو انہوں نے ویزا کے لئے مذکورہ ایجنسی کو دی تھی۔ اسی پس منظر میں پولیس نے فوری کارروائی کرتے ہوئے غیر قانونی ٹریویل ایجنسیوں پر شکنجہ کسنا شروع کیا ہے۔
سٹی پولیس کمشنر نے عوام سے گزارش کی ہے کہ بیرونی ملازمت کے ویزا سے متعلقہ کسی بھی معاملے میں صرف ان ٹریویل ایجنسیوں سے ہی رابطہ کریں جن کے پاس مرکزی حکومت کے محکمہ خارجہ معاملات (فارن افیئرز) کی تصدیق اور اجازت نامہ موجود ہو۔ اور غیر مجاز ایجنسیوں کے ساتھ معاملات طے کرکے خواہ مخواہ مصیبتوں اور خسارے کا شکار نہ ہوں۔