منگلورو پولیس کمشنر نے کروائی منشیات فروشوں کی پریڈ
منگلورو22/جولائی (ایس او نیوز)شہر کے پولیس کمشنر سندیپ پاٹل نے منشیات فروشی کے خلاف سخت اقدامات کرنے اور نشیلی اشیاء سے شہر کو پاک کرنے کا عزم کیا ہے۔ اس سمت میں اہم قدم اٹھاتے ہوئے انہوں نے شہراور اطراف میں منشیات فروشی کے تعلق سے پکڑے گئے تمام افراد کو ایک جگہ جمع کرکے ان کی پریڈ کروائی اور اس دھندے سے باز رہنے کی تاکید کرتے ہوئے کہا کہ اگر وہ آئندہ منشیات فروشی میں ملوث پائے گئے تو ان کے خلاف کڑی کارروائی کی جائے گی۔
موصولہ رپورٹ کے مطابق اس پریڈ میں منشیات فروشی کے 94سابق ملزمین حاضر تھے۔پولیس کمشنر نے ان افراد سے مخاطب ہوکر کہا کہ پولیس نے شہر کومنشیات کے کاروبار سے بالکل پاک کرنے کا تہیہ کرلیا ہے۔اس لئے ایسے تمام افراد کو چاہیے کہ وہ سماج کی صحت کو نقصان پہنچانے والی ہر قسم کی سرگرمی سے دور رہیں۔پولیس کمشنر متعلقہ علاقوں کے پولیس افسران کو ہدایت دی کہ پرانے منشیات فروشوں کی موجودہ سرگرمیوں کی کڑی نگرانی کریں۔