منگلورو:پولیس اسکواڈ نے ناکام بنائی مویشیوں کی غیر قانونی رفت کی کوشش۔ ٹرک اور جانور پولیس ضبط۔ ملزمین ہوگئے فرار
منگلورو،27؍اکتوبر (ایس او نیوز) مویشیوں کی چوری اور غیر قانونی سپلائی روکنے کے لئے منگلورو سٹی پولیس نے جو اسکواڈ تشکیل دیا ہے اس نے مصدقہ اطلاع کی بنیاد پر کارروائی کرتے ہوئے گائے اور بچھڑوں کی غیرقانونی رفت کی کوشش ناکام بنادی ہے۔
پولیس کی طرف سے جاری تفصیلات کےمطابق ایک پِک اَپ ٹرک میں غیر قانونی طور پر جانور رفت کیے جانے کی مصدقہ اطلاع ملنے پرکنکن ناڈی اسٹیشن ہاؤس آفیسر (ایس ایچ او) کی قیادت میں مویشی چوری اور غیر قانونی سپلائی اسکواڈ نے پڈیل چیک پوسٹ کے پاس بنٹوال کی طرف سے آرہے ٹرک کو روکنے کی کوشش کی ، مگر ٹرک سوار تیزرفتاری کے ساتھ آگے نکل گئے۔ پولیس اسکواڈ نے اس ٹرک کا پیچھا کیا تو اس میں موجود ملزمین نے پمپ ویل کے پاس جانوروں سے بھرا ٹرک چھوڑ کر راہ فرار اختیار کی۔
پولیس کا کہنا ہے کہ ٹرک کی تلاشی لینے پر اس میں چھ گائیں ، ایک بیل اور پانچ بچھڑے ظالمانہ انداز میں ٹھونسے ہوئے پائے گئے ۔پولیس اسکواڈ نے ٹرک اور اس میں موجود مویشی ضبط کرلیے ۔کنکن ناڈی پولیس اسٹیشن میں کیس درج کرلیا گیا ہے۔ پولیس کا کہنا ہے کہ وہ جلد ہی ملزمین کو گرفتار کرلے گی۔ اس دوران عدالت کے حکم پر ضبط کیے گئے مویشیوں کو پجیرو میں بنے ہوئے جانوروں کے ’شیلٹر ہوم‘ میں بھیج دیا گیا ہے۔
مویشی چوری اور غیر قانونی سپلائی روکنے کے لئے پولیس اسکواڈ: خیال رہے کہ منگلورو پولیس کی طرف سےخصوصی اسکواڈ تشکیل دیا گیا ہے جس نے امسال5 اکتوبر سے اپنی سرگرمیوں کا آغاز کیا ہے۔اس میں سٹی کرائم برانچ کے افسران اور دیگر عملہ شامل ہے۔جانوروں کی سپلائی اور چوری کو روکنے کے لئے 32مقامات پر چیک پوسٹس بنائے گئے ہیں، جہاں آنے جانے والی گاڑیوں پر نظر رکھی جاتی ہے۔ اس اسکواڈ کی طرف سے رات وقت چوکسی اور نگرانی بڑھا دی جاتی ہے، جبکہ علی الصبح پٹرولنگ کرنے والی ٹیم کے ساتھ سب انسپکٹر کے درجے کا ایک آفیسر ہوا کرتا ہے۔سب ڈیویژن لیول پر نگرانی کے لئے سب انسپکٹر درجے کے ایک آفیسر کو سپروائزر مقرر کیا گیا ہے۔
پولیس کا کہنا ہے کہ اس مہینے میں جب سے یہ اسکواڈ تشکیل دیا گیاہے، اب تک گئو ذبیحہ پر پابندی والے قانون کے تحت مویشیوں کی غیر قانونی رفت کے 7معاملے پکڑے گئے ہیں اور 28مویشی بچالیے گئے ہیں۔