منگلورو،3؍اپریل (ایس او نیوز)ضلع انتظامیہ نے کووڈ گائڈ لائنس کی پابندی نہ کرنے والوں کے خلاف جو کارروائی شروع  کی ہے اس کےنتیجے میں چہرے پر ماسک نہ پہننے والوں سے اب تک  بڑا بھاری جرمانہ وصول کیا گیا ہے۔

ضلع انتظامیہ کی طرف سے جاری اعداد و شمار کے مطابق 31 مارچ تک جنوبی کینرا میں کووڈ متاثرین کی تعداد 40 ہزار تک پہنچ گئی۔ جبکہ چہرے پر ماسک نہ لگانے کے 40,368 معاملے درج ہوئے جن سے 42,11,630 روپے وصول کیے گئے ہیں۔ لیکن اس کے باوجود ضلع میں کووِڈ کی دوسری لہر پر لگام کسنے میں کوئی خاص کامیابی نہیں ملی ہے، بلکہ مسلسل اضافہ سامنے آرہا ہے۔

یاد رہے کہ 22 مارچ کو ڈپٹی کمشنر ڈاکٹر راجیندرا نے خود مارکٹ ، مالس اوردکانوں اور بسوں پر چڑھ کر ماسک نہ لگانے پر جرمانہ عائد کیا تھا اور چہرے پر ماسک لگانے کی مہم چلائی تھی، جس کے بعد سے ماسک کی جانچ کا کام محکمہ پولس سمیت دیگر محکمہ کی طرف سے بھی  جاری ہے، ایک طرف ضلع انتظامیہ کورونا کو پھیلنے سے روکنے کے لئے اپنی طرف سے احتیاطی اقدما ت اُٹھانے میں لگے ہیں، لیکن دوسری طرف ایسا لگتا ہے جیسے  لوگ کورونا کی  پرواہ ہی نہیں کررہے ہیں۔