منگلورو : آن لائن کسٹمر کیئر ایپ کے ذریعہ چلایا جارہا ہے دھوکہ دہی کا جال ۔ پولیس کانسٹیبل سمیت دو افراد نے گنوائے لاکھوں روپے
منگلورو ،5 ؍اپریل (ایس او نیوز) بینک کھاتوں سے رقم اڑانے والے گروہ ہر سطح پر سرگرم ہیں اور احتیاط برتنے کی لاکھ ہدایتوں کے باوجود آئے دن لوگ ان کے جال میں پھنس جاتے ہیں ۔ اب آن لائن کسٹمر کیئر ایپ کے ذریعے لوٹے جانے کے 2 تازہ ترین معاملے سامنے آئے ہیں جس میں ایک پولیس کانسٹیبل 50 لاکھ روپے اور دوسرا شخص 1.92 لاکھ روپے گنوا بیٹھا ہے ۔
بتایا جاتا ہے کہ منگلورو کے پولیس کانسٹیبل نے کوئی چیز آن لائن منگوائی تھی ۔ جب بہت دن گزرے اور وہ چیز نہیں آئی تو اس نے اس کی جانکاری لینے کے لئے آن لائن دستیاب ہیلپ لائن کا سہارا لیا جہاں اس سے کہا گیا کہ Anydesk نامی ایپ ڈاون لوڈ کرے ۔ اس نے یہ ایپ ڈاون لوڈ کیا اور دھوکہ بازوں نے اس ایپ کے ذریعے کانسٹیبل کے کھاتے سے 50 لاکھ روپے اڑا لیے ۔
دوسرا معاملہ ایک ایسے شخص کا ہے جس نے اپنے دو میں سے ایک اے ٹی ایم کارڈ کو کینسل کرنے کے لئے آن لائن ملنے والی ہیلپ لائن کی ہدایت پر Anydesk ایپ کا سہارا لیا اور اس کے کھاتے سے 1.92 لاکھ روپے غائب کر دئے گئے ۔
سائبر کرائم پولیس کا کہنا ہے کہ بہت سارے مشہور سائٹس کے نام پر نقلی کسٹمر کیئر نمبرس موجود ہیں ۔ اکثر لوگ بینک سے متعلق امور یا آن لائن خریداری سے متعلق معاملات میں مدد لینے کے لئے ہیلپ لائن نمبرس کو آن لائن سرچ کرتے ہیں اور وہ دھوکہ دہی کے جال میں پھنس جاتے ہیں ۔
سائبر سیکیوریٹی کے ماہرین کہتے ہیں کہ لوگوں کو جب بھی بینک سے متعلق کام ہو تو انہیں بینک کے آفیشیل ایپ کا ہی سہارا لینا چاہیے اور وہاں پر موجود ہیلپ لائن نمبروں پر ہی رابطہ کرنا چاہیے ۔ ورنہ آن لائن سرچ کرتے ہوئے فریب کاروں کے ہتھے چڑھنے سے انہیں کوئی روک نہیں سکتا ۔
