منگلورو،2/جولائی (ایس او نیوز) جنوبی کینرا کی ڈپٹی کمشنر سندھو بی روپیش نے کہا ہے کہ ضلع کی سرحدوں کو سیل ڈاؤن کرنے کا کوئی منصوبہ نہیں ہے۔ اس سلسلے میں جو افواہیں پھیلائی جارہی ہیں اس پر عوام بالکل دھیان نہ دیں۔

ڈی سی نے کہا کہ اگر اس طرح کا کوئی فیصلہ کیا جاتا ہے تو پھر عوام کو اس سلسلے میں پہلے ہی سے آگاہ کردیا جائے گا۔انہوں نے عوام سے کہا کہ”براہ کرم جھوٹی اور بے بنیاد خبریں نہ پھیلائیں۔ ریاستی حکومت کی طرف سے لاک ڈاؤن کے نئے احکامات موصول نہیں ہوئے ہیں۔ فی الحال پہلے سے جو قوانین لاگو ہیں انہی پر عمل کیا جارہا ہے اور یونہی جاری رہیں گے۔اب ان میں کوئی تبدیلی ہوتی ہے تو پھرا س سے عوام کو واقف کردیا جائے گا۔“