منگلورو،3؍اپریل (ایس او نیوز) پولیس نے لوٹ مار، نقب زنی ، چوری اور ڈکیتی میں ملوث ایک بدنام زمانہ گینگ کے 9 اراکین کو گرفتار کرلیا ہے۔

پریس کانفرنس سے خطاب کرتے ہوئے پولیس کمشنر ششی کمار نے بتایا:" جنوبی کینرا اور اڈپی ضلع کے مختلف مقامات پر گھروں میں نقب زنی، چوری، ڈکیتی، مویشی چوری اور سڑکوں پر مسافروں کو لوٹنے والی ایک گینگ کو پولیس نے گرفتگار کرلیا ہے۔ اس گینگ کے اراکین نے موڈ بیدری، مُلکی، بجپے، کارکلا، وینور، بیلتنگڈی، دھرمستھلا وغیرہ میں وارداتیں انجام دی ہیں ۔ اس کے علاوہ بینگلورو سٹی، بینگلورو رورل، ہاسن، میسورو، چترادرگہ اورریاست کے دیگر پولیس اسٹیشنوں کے حدود میں ہونے والی وارداتوں اس گینگ کا ہاتھ ہونے کا پتہ چلا ہے۔"

پولیس کمشنر نے گرفتار ملزمین کی تفصیلات ظاہر کرتے ہوئے کہا: عبدالرووف(24سال) جرائم کے 12 معاملے، راما مورتی (23سال) 8 معاملے، اشرف پراڈی (27سال) 9 معاملے، سنتوش (24سال) 9 معاملے، نوید (36سال) 1معاملہ، راما نندا شیٹی (48 سال) 7 معاملے، سُمن (24سال) 7معاملے، صدیق (27سال) 7 معاملے،اور علی کویا 8 جرائم کے معاملات میں شامل ہیں۔

پولیس کا کہنا ہے کہ ملزمین کے قبضے سے چار پہیوں والی تین موٹر گاڑیاں، ایک آٹو رکشہ، 4 دوپہیہ گاڑیاں، 11 موبائل فون، 250 گرام وزنی سونے کے زیورات ضبط کیے گئے ہیں جس مجموعی مالیت کا اندازہ 32.22 لاکھ روپے لگایا گیا ہے۔ اس کے علاوہ دو چھوٹی تلواریں، ایک ایئرگن، ایک لوہے کی سلاخ، ایک لوہے کا لیور، ایک لمبا چاقو، ایک مرچی پاوڈر کا پیکیٹ، کرکٹ اسٹمپس او ڈنڈے برآمد کیے گئے ہیں۔ ایک ملزم کے بارے میں پتہ چلا ہے کہ اس نے ہاسن ضلع میں ایک واردات کے دوران لائسنس والا ریوالور بھی چرا لیا تھا۔ اس ضمن میں تفصیلی جانچ کی جارہی ہے۔