منگلورو : این آئی اے نے مارا سابق ایم ایل اے کے گھر پر دوبارہ چھاپہ ۔ بہو کو کیا گرفتار
منگلورو،3؍ جنوری (ایس او نیوز) نئی دہلی سے آنے والی این آئی اے کی ٹیم نے اُلال کے سابق ایم ایل اے عیدن ابّا کے بیٹے بی ایم باشاہ کے گھر پر پھر ایک مرتبہ چھاپہ مارا اور باشاہ کی نومسلم بہو مریم کو گرفتار کر لیا ۔
خیال رہے کہ نیشنل انویسٹی گیشن ایجنسی کی ایک ٹیم نے اس سے قبل اگست 2021 میں بی ایم باشاہ کے گھر پر چھاپہ مارا تھا اور آئی ایس آئی ایس کی دہشت گردانہ کارروائیوں میں ملوث ہونے کے لئے نوجوانوں کو بھرتی کروانے کے الزام میں باشاہ کے چھوٹے بیٹے عمار عبدالرحمان کو گرفتار کیا تھا ۔ اس چھاپے کے دوران باشاہ کے دوسرے بیٹے انس عبدالرحمان کی نومسلم بیوی مریم (سابقہ نام دپیتی) کو بھی شک کے گھیرے میں لیتے ہوئے اس سے دو دن تک سخت تفتیش کی تھی مگر اُس وقت اسے گرفتار نہیں کیا گیا تھا ۔
آج پھر سے تفتیشی آفیسر (آئی او) ڈی ایس پی کرشنا کمار ، پولیس انسپکٹر اجئے سنگھ اور مونیکا دھیکوال کی ٹیم دہلی سے الال پہنچی اور باشاہ کے گھر پر چھاپہ ماری کے بعد مریم کو گرفتار کر لیا ۔ مریم کے بارے میں معلوم ہوا ہے کہ اس کا تعلق کورگ سے ہے ۔ وہ جب ڈینٹل کالج میں زیرتعلیم تھی تو باشاہ کے فرزند انس کے عشق میں گرفتار ہوگئی ۔ پھر اس نے اسلام قبول کیا اور دیپتی سے مریم بن گئی ۔ پھر اس نے اپنی زندگی کا انداز پوری طرح بدل لیا اور دین کی پابند ہوگئی ۔ این آئی اے کے ذرائع کا کہنا ہے کہ آئی ایس آئی ایس کی انتہا پسندانہ اور دہشت گردانہ کارروائیوں کی سوشیل میڈیا میں تشہیر کرنے اور نوجوانوں کو آئی ایس آئی ایس میں شامل کرنے کے لئے جو گروپ کام کررہا تھا اس کے ساتھ مریم کے بھی روابط تھے ۔ مریم اور اس کے ساتھیوں پر یہ بھی الزام ہے کہ جموں و کشمیر کے دہشت گردوں کے ساتھ بھی ان کے تعلقات تھے اور انہوں نے ملک کے مختلف علاقوں سے نوجوانوں کو راغب کرنے کی مہم چلا رکھی تھی ۔