الال : آئی ایس آئی ایس سے رابطہ ہونے کا شبہ ۔ سابق ایم ایل اے عیدن ابّا کے بیٹے کے گھر پر این آئی اے نے مارا چھاپہ
الال، 4؍ اگست (ایس او نیوز) شام کی دہشت گرد تنظیم آئی ایس آئی ایس سے رابطہ ہونے کے شبہ میں نیشنل انویسٹی گیشن ایجنسی کی ٹیم نے الال کے سابق رکن اسمبلی بی ایم عیدن ابّا کے بیٹے بی ایم باشاہ کے گھر پر صبح کی اولین ساعتوں میں چھاپہ مارا ۔
موصولہ رپورٹ کے مطابق نیشنل انویسٹی گیشن ایجنسی کی ڈائریکٹر اوما کی قیادت میں 25 نفری ٹیم بنگلورو سے الال کے ماستی کٹے پہنچی اور مقامی پولیس کے تحفظ میں چھاپہ ماری اور تلاشی کی کارروائی شروع کی ۔ بتایا جاتا ہے کہ بی ایم باشاہ اور ان کی فیمیلی اس گھر میں رہتی ہے ۔ باشاہ کا تعلق ریئل ایسٹیٹ کاروبار سے تھا ۔ ان کے دو بیٹے بیرون ملک مقیم ہیں ۔
شبہ کیا جارہا ہے کہ ان لوگوں کے رابطے آئی ایس آئی ایس اور کشمیری دہشت گرد گروپس کے ساتھ ہیں اور مبینہ طور پر وہ ان تنظیموں کے لئے اپنے دل میں نرم گوشہ رکھتے ہیں۔ الزام لگایا جارہا ہے کہ ان کی فیمیلی کے لوگوں نے یوٹیوب پر ایسے چینلس سبسکرائب کر رکھے ہیں جو آئی ایس آئی ایس سے تعلق رکھتے ہیں ۔ اس کے علاوہ جموں و کشمیر کی ایک دہشت گرد تنظیم کے نوجوان اراکین کے ساتھ ان کے ٹیلی فون پر رابطے ہیں ۔
یہ بھی دعویٰ کیا جارہا ہے کہ باشاہ کی ایک بیٹی کچھ سال پہلے کیرالہ سے لاپتہ ہوگئی تھی اور بعد میں اس نے شام کی آئی ایس آئی ایس تنظیم میں شمولیت اختیار کر لی ہے ۔