منگلورو30/جون (ایس او نیوز) ملک بھر میں اقلیتوں اور خاص کرکے مسلمانوں کے خلاف شدت پسند ہندو تنظیموں کے جانب سے ہورہے جان لیوا ہجومی تشدد کے خلاف جنوبی کینرا ڈی سی دفتر کے سامنے مسلم ڈیولپمنٹ کمیٹی کے بینر تلے ایک خاموش احتجاجی مظاہرہ کیا گیا۔

احتجاجی مظاہرین نے اپنے منھ پر کالی پٹیاں باندھ رکھی تھیں۔اور ہاتھوں میں پلے کارڈ زاٹھا رکھے تھے جن پردنیا میں ملک کی بدنامی کا سبب بننے والے فرقہ وارانہ اور ہجومی تشدد کو ختم کرنے اور مذہب کے نام پر بے قصور افراد کے قتل کیے جانے کا سلسلہ روکنے کے مطالبات درج تھے۔ پلے کارڈزپر یہ جملے بھی درج تھے کہ مرکزی سرکار اور بی جے پی کی وجہ سے ملک میں خوف ودہشت کا ماحول برپا ہوگیا ہے۔حکومت اورعوامی منتخب نمائندوں کو اس کا سنجیدگی سے نوٹس لینا ہوگا اور اس طرح کے ظلم و ستم پر روک لگانے کے اقدامات کرنے ہونگے۔احتجاجی مظاہرین نے اسی قسم کے مطالبات پر مبنی ایک میمورنڈم ضلع ڈپٹی کمشنر کو پیش کیا۔

اس موقع پر کمیٹی کے قائدین امیر تومبے،رفیع الدین کودرولی، علی حسن، ذاکر حسین الال، رفیق پانیل، خالد الال، وہاب کودرولی، مصطفی ملار وغیرہ موجود تھے۔