منگلورو پبجی گیم مرڈر کیس: ملزم بیٹے کو پناہ دینے کے الزام میں پولیس نے کیا باپ کو گرفتار
منگلورو ،6؍اپریل (ایس او نیوز) پبجی گیم پر جھگڑے کے بعد عاکف نامی کم عمر لڑکے کو قتل کرنے والے ایک نابالغ لڑکے کے باپ کو پولیس نے اس الزام میں گرفتار کرلیا کہ اس نے جرم کی معلومات ہونے کے باوجود اپنے بیٹے کو چھپے رہنے میں مدد کی اور پولیس کو اس کی اطلاع نہیں دی تھی۔
سنتوش(45 سال) کے سی روڈ پیلی کور کا رہنے والا ایک لاری ڈرائیور ہے۔ اس کے بیٹے نے اپنے دوست عاکف کا سر پتھر سے کچل کر اسے مار ڈالا تھا۔ پولیس کا کہنا ہے کہ قتل کی واردات کے بعد لڑکے نے گھر پہنچ کر پوری بات اپنے والد اور گھر والوں کو بتائی تھی، مگر ان لوگوں نے یہ بات پوشیدہ رکھی اور پولیس کو بھی خبر نہیں دی۔ اس لئے جرم کی بات چھپائے رکھنے اور ملزم کو پناہ دینے کے الزام میں سنتوش کو گرفتار کیا گیا۔
پولیس نے لڑکے کو پہلے ہی گرفتار کیا تھا جسے قانونی طور پر نابالغ ہونے کی وجہ سے کل اس کو بچوں سے متعلق عدالت (جُوِینائل جسٹس بورڈ) کے سامنے پیش کیا گیا اور وہاں سے اس کو ریمانڈ ہوم میں بھیج دیا گیا۔
بتایا گیا ہے کہ جب سے پولیس نے عاکف مرڈر کیس کو حل کیا ہے تب سے مبینہ طور پر کچھ مقامی افراد گرفتار شدہ لڑکے کے گھر والوں کو دھمکیاں دے رہے ہیں۔ چونکہ اس وقت صرف لڑکے کی ماں اور اس کا بھائی دونوں ہی گھر پر رہتے ہیں، اس لئے الال پولیس نے وہاں پر سیکیوریٹی کا انتظام کردیا ہے۔