منگلورومیں ایک نوجوان پر جان لیوا حملہ۔ ملزم فرار ہونے میں کامیاب
منگلورو27/جولائی (ایس او نیوز) شہر کے مالیمار علاقے میں ایک نوجوان پر چاقو سے جان سے لیوا حملہ کرنے کے بعد ملزم فرار ہونے میں کامیاب ہوگیا ہے۔ حملہ آور کا نام دھیرج (20سال)اور حملے میں زخمی ہونے والے نوجوان کا نام رتن راج(28سال) بتایا جاتا ہے۔
موصولہ رپورٹ کے مطابق رتن اور دھیرج کے درمیان بہت دنوں سے کسی مسئلے پر دشمنی چل رہی تھی۔ منگلا دیوی علاقے کے رہائشی رتن راج نے اپنے دوست پونیت سے اس بات کا تذکرہ کیا تو اس نے دونوں کے درمیان صلح کروانے کی پیش کش کی۔پونیت نے رتن اور دھیرج کو جمعرات کی شب میں مالیمار علاقے میں بلایا تاکہ دونوں کے درمیان مصالحت کی کوشش کی جائے۔ جب وہ تینوں وہاں پر پہنچ گئے تو دھیرج اور رتن کے درمیان گرماگرم بحث شروع ہوگئی اور دیکھتے ہی دیکھتے دھیرج نے اپنی بائک سے ایک چاقو نکالا اور رتن راج پر جان لیوا حملہ کرکے فرار ہوگیا۔ جبکہ دھیرج کے ارادوں سے بے خبر پونیت حیرت سے منھ دیکھتا رہ گیا۔
کوورپولیس اسٹیشن میں دھیرج کے خلاف قتل کی کوشش کا کیس درج کرلیا ہے اور اس کی گرفتاری کے لئے جال بچھایا ہے۔ زخمی رتن راج کے بارے میں پولیس نے بتایا کہ وہ اسپتال میں زیرعلاج ہے اور خطرے سے باہر ہے۔