منگلورو،8؍ نومبر (ایس او نیوز) مورگنس گیٹ کے پاس واقع گھر میں اپنی بیوی، بیٹی اور بیٹے کو زہر دے کر ہلاک کرنے کے بعد ایک شخص نے پھانسی لگا کر خود کشی کرلی ۔

ذرائع سے ملی اطلاع کے مطابق مہلوکین ناگیش شیریگوپی (30 سال)، وجیا لکشمی (26سال)، سپنا  (8 سال) اور سامرتھ (4 سال)کا تعلق بیلگی تعلقہ کے سناگا گاوں سے تھا ۔

بتایا جاتا ہے امسال اکتوبر میں ناگیش اور اس کی بیوی میں ان بن ہوگئی تھی اور وہ بچوں کے ساتھ گھر چھوڑ کر غائب ہوگئی تھی ۔ جس کے بعد ناگیش نے گم شدگی کی رپورٹ پولیس کے پاس درج کروائی تھی ۔ پھر ان دونوں نے پولیس اسٹیشن میں مصالحت کرلی تھی اور ایک ساتھ رہنے کا فیصلہ کیا تھا ۔

پولیس کا کہنا ہے کہ  ناگیش نے ڈیتھ نوٹ اور اسسٹنٹ پولیس سب انسپکٹر کو بھیجے گئے وائس میسیج  میں اپنے اس انتہائی اقدام کے لئے نورجہاں نامی ایک خاتون کو ذمہ دار قرار دیا  جس کے مکان میں وجیا لکشمی ملازمت کرتی تھی اور وہ اس خاتون سے بہت ہی قریبی تعلقات رکھتی تھی ۔ ناگیش کو شبہ ہو گیا تھا کہ نورجہاں اس کی بیوی کا مذہب تبدیل کروائے گی ۔ 

پولیس نے بتایا کہ اس پس منظر میں پولیس نے نورجہاں کو تفتیش کے لئے تحویل میں لیا اور معاملہ کے جانچ کی جارہی ہے ۔