منگلورو ،21؍ اپریل (ایس او نیوز) منگلورو تعلقہ کے ہلے انگڈی نامی گاوں میں کھلے میدان میں کھیلنے والے دو بچے آسمانی بجلی کی زد میں آگئے جن میں سے ایک بعد میں زخموں کی تاب نہ لاکر چل بسا، البتہ دوسرا بچہ بھی شدید زخمی ہوا ہے اور اُسے بے حد نازک حالت میں اسپتال میں داخل کیا گیا ہے۔
ذرائع سے ملی اطلاع کے مطابق منگل کے دن ہلے انگڈی کے اندرا نگر میں شام کے وقت یہ حادثہ پیش آیا جب منصور کا پانچ سالہ فرزند نیہان اور دُرگپّا کا چھ سالہ فرزند مروتیش دوسرے بچوں کے ساتھ باہر میدان میں کھیل رہے تھے۔ اس وقت اچانک بجلی کڑکی اور یہ دونوں بچے ایک ساتھ بے ہوش ہوکر گر پڑے۔ ساتھ میں کھیل رہے بچے دوڑ کر اپنے اپنے گھر پہنچے اور بجلی گرنے کی بات بتائی۔ تب مقامی لوگوں نے موقع پر پہنچ کر بجلی کی زد میں آنے سے زخمی ہونے والے بچوں کو موکا کے ایک نجحی اسپتال میں داخل کروایا۔ مگر چونکہ بچوں کی حالت بہت سنگین تھی اس لئے بہترعلاج کے لئے انہیں منگلورو کے نجی اسپتال میں منتقل کیا گیا ۔ مگر ان میں سے نیہان نے آج بدھ کو اپنی آخری سانس لی اور داعی اجل کو لبیک کہہ گیا۔