منگلورو : چیک باونس معاملہ : گرفتاری سے بچنے کے لئے کوناجے گرام پنچایت صدر روپوش
منگلورو ،12؍ جنوری (ایس او نیوز) ایک چیک باونس معاملہ میں عدالت کی طرف سے وارنٹ جاری ہونے کے بعد کوناجے گرام پنچایت صدر چنچالکشی گرفتاری سے بچنے کے لئے روپوش ہوگئیں ۔
بتایا جاتا ہے کہ الال کی رہنے والی مامتا شائن ڈیسوزا اور چنچالکشی ایک ہی پارٹی سے تعلق رکھتی ہیں اور مامتا نے چنچالکشی کو مالی بحران سے بچنے کے لئے 3 لاکھ روپے قرض دئے تھے اور اس کی واپسی کے لئے چنچالکشی نے مامتا کو چیک دیا تھا ۔ لیکن مقررہ تاریخ پرچیک بینک میں جمع کرنے پر وہ باونس ہوگیا ، جس کے بعد مامتا نے کوناجے پولیس اسٹیشن میں شکایت درج کروائی اور عدالت میں مقدمہ شروع ہوگیا ۔
چنچالکشی ابتدا میں دو چار مرتبہ عدالت میں حاضری دی اور پھر اس نے سماعت کے موقع پر عدالت سے غائب رہنا شروع کیا ۔ عدالت نے 7 جنوری کو اس کے خلاف گرفتاری وارنٹ جاری کیا ۔ مامتا کا کہنا ہے کہ پولیس نے فوری کارروائی کرتے ہوئے چنچالکشی کو گرفتار کرنے میں دلچسپی نہیں دکھائی جس کے بعد مامتا کہ یہ معاملہ اسسٹنٹ کمشنر آف پولیس کے سامنے پیش کیا تو پولیس مامتا کو ساتھ لے کر چنچالکشی کو گرفتار کرنے اس کے گھر پہنچی ۔ مگر وہاں دروازے پر تالا پڑا ہوا ملا اور اس کا موبائل فون بھی سوئچ آف پایا گیا ۔ جس کا مطلب صاف تھا کہ وہ لاپتہ ہوگئی ہے ۔ مامتا نے ناگواری کا اظہار کرتے ہوئے کہا کہ پولیس کی کارروائی میں تاخیر کی وجہ سے چنچالکشی کو روپوش ہونے کا موقع مل گیا ۔ جبکہ بی جے پی والے مطالبہ کررہے ہیں کہ اخلاقی ذمہ داری لیتے ہوئے چنچالکشی کو گرام پنچایت صدر کی حیثیت سے مستعفی ہونا چاہیے ۔