منگلورو، 23/ جنوری (ایس او نیوز) کاوور کے پالنیورو نامی مقام پر معاشی طور پر کمزور خاندان ایک گھر اس وقت جل کر خاکستر ہوگیا جب اس میں اچانک آگ بھڑک اٹھی۔ 
    
بتایا جاتا ہے کہ شانتا اور رمانی نامی دو بہنیں اپنے بھائی یشونت کے ساتھ اس گھر میں رہتے ہیں اور وہ سب کے سب روزانہ مزدوری کے لئے چلے جاتے ہیں ۔ آج بھی صبح جب وہ لوگ مزدوری کے لئے گھر سے باہر گئے تو اچانک آگ لگ گئی جس کا سبب ابھی معلوم نہیں ہوا ہے۔
    
مقامی لوگوں نے جب دیکھا کہ بند گھر سے دھویں کے بادل اٹھنے لگے ہیں تو انہوں نے دروازہ توڑ کر آگ بجھانے کی کوشش کی۔ اس کے بعد فائر سروس کا عملہ موقع پر پہنچ گیا اور آگ بجھانے میں کامیاب ہوا۔ لیکن تب تک گھر میں موجود تمام سامان، کپڑے اور دستاویزات جل کر خاک ہوچکے تھے۔ گھر کے لوگوں کا کہنا ہے کہ گروی رکھے ہوئے کچھ سونے کے زیورات چھڑائے گئے تھے وہ الماری میں تھے اور بقیہ  زیور چھڑانے کے لئے جو نقد 20 ہزار روپے الماری رکھے تھے وہ سب آگ کی نذر ہو گئے۔ 
    
مقامی ایم ایل اے اور پنچایت کے ذمہ داران نے جائے وقوع پر پہنچ کر معائنہ کیا اور متاثرین کو سرکاری امداد فراہم کرنے کا بھروسہ دلایا۔