منگلورو: رکن اسمبلی یوٹی قاد ر کی مداخلت کے بعد نجی اسپتال ہوا پوزیٹیو حاملہ خاتون کے علاج پر راضی
منگلورو،6؍جولائی (ایس او نیوز)ایک نجی اسپتال میں زچگی کے لئے داخل ہونے والی خاتون کی کورونا جانچ رپورٹ پوزیٹیو آنے کے بعد اسپتال نے اس کاعلاج اور زچگی کرنے سے انکار کردیا۔ مگر رکن اسمبلی یوٹی قادر کی مداخلت کے بعداسپتال انتظامیہ اس خاتون کی زچگی اور علاج کے لئے راضی ہوگئی۔
کہا جاتا ہے کہ صرف زچگی کے لئے مذکورہ خاتون نجی اسپتال میں داخل ہوئی تھی۔ لیکن اسپتال کی طرف سے اس کی کووِڈ جانچ کروائی گئی تو رپورٹ پوزیٹیو نکلی۔ تب اسپتال والوں نے اس کی زچگی کروانے سے انکار کردیا۔ یہ بات یوٹی قادر کے علم لائی گئی تو انہوں نے اس اسپتال کے ذمہ داروں کو سمجھانے کی کوشش کی مگر وہ لو گ راضی نہیں ہوئے۔ پھرمختلف دوسرے اسپتالوں سے بھی رابطہ کیا، لیکن کسی ایک نجی اسپتال نے بھی اس خاتون کو اپنے یہاں داخل کرنے پر رضامندی ظاہر نہیں کی۔ تب رکن اسمبلی یوٹی قادر نے یہ معاملہ ڈپٹی کمشنر کے علم میں لایا۔ پھر اس کے بعد اسی اسپتال والے علاج پر راضی ہوگئے جہاں وہ خاتون پہلے سے داخل تھی۔
یوٹی قادر نے بتایا کہ کل شام کو اس خاتون نے ایک صحت مند بچے کو جنم دیا ہے۔انہوں نے ضلع انتظامیہ پر زور دیا ہے کہ اس موضوع پر بات چیت کے لئے وہ جلد ازجلد پرائیویٹ اسپتالوں کی ایک مشترکہ میٹنگ طلب کرے اورکورونا پوزیٹیو حاملہ خواتین کو اسپتالوں میں داخل کرنے اور ان کا علاج کرنے کے لئے ہدایات جاری کرے۔ یہ بہت ہی ضروری ہوگیا ہے کیونکہ حاملہ خواتین کو عین زچگی کے موقع پرٹیسٹ رپورٹ پوزیٹیو آنے کی صورت میں انتہائی دشواریوں کا سامنا کرنا پڑ رہا ہے۔