منگلورو، 30 ؍ جون (ایس او نیوز) گزشتہ دو دنوں سے برسنے والی بھاری بارش کی وجہ سے ایک طرف منگلورو شہر کی سڑکیں تالاب بن گئیں تو دوسری طرف برساتی پانی ایک پرائیویٹ اسپتال کے اندر گھس گیا ۔ موسلا دھار بارش کو دیکھتے ہوئے بعض نجی اسکولوں نے چھٹی کا اعلان کر دیا ۔
    
ذرائع سے ملی اطلاع کے مطابق منگلورو سے موڈ بیدری جانے والا روڈ پوری طرح پانی میں ڈوب گیا ہے جس کی وجہ سے ٹریفک جام لگ گیا ۔ کوڈوپو سے شکتی نگر تک کی ٹریفک بالکل منقطع ہوگئی اور لوگوں ایک گھنٹے تک آگے بڑھنے کا موقع نہیں ملا ۔ اس کے علاوہ کوٹاری چوکی اور دوسرے علاقوں میں بارش کے  قہر لوگوں کے معمولات زندگی ابتر ہونے کی خبریں مل رہی ہیں ۔
    
ڈپٹی کمشنر ڈاکٹر کے وی راجیندرا نے بتایا : "ضلع میں بھاری بارش ہو رہی ہے اور ہم حالات پر مسلسل نظر رکھے ہوئے ہیں تا کہ عوامی جان و مال کو نقصان سے بچایا جا سکے ۔ ہم نے اسکولوں کو ہدایت دی ہے کہ اگر بچے اسکول میں پہنچ چکے ہیں تو ان کی پڑھائی جاری رکھیں اور جن علاقوں سے بچوں کا اسکول پہنچنا مشکل ہے ایسے اسکولوں میں چھٹی کا اعلان کر دیا گیا ہے ۔ محکمہ تعلیمات کے افسران کو  بچوں کی حفاظت کا پورا بندوبست کرنے اور  متعلقہ جات میں حالات کو دیکھتے ہوئے اسکولوں میں چھٹی کا اعلان کرنے کا اختیار دیا گیا ہے ۔"
    
ڈی سی نے بتایا کہ " محکمہ موسمیات نے جمعرات کے دن کے لئے آرینج الرٹ جاری کیا تھا ۔ کل جمعہ کے دن بھی اسی طرح موسلا دھار بارش جاری رہے گی ۔"