ساحلی کرناٹکا میں آئندہ تین دنوں تک موسلادھار برسات ہوگی۔ محکمہ موسمیات کی پیشین گوئی
منگلورو،10؍اگست (ایس او نیوز)گزشتہ ایک ہفتے سے ساحلی کرناٹکا کے مختلف اضلاع میں بھاری برسات اور سیلاب کا سلسلہ جاری ہے۔ محکمہ موسمیات کی طرف سے پیشین گوئی کی گئی ہے کہ آئندہ تین دنوں تک یہی کیفیت ہوسکتی ہے۔
جنوبی کینرا کے کئی علاقوں میں ریڈ، آرینج اور ایلو الرٹ جاری کیے گئے ہیں۔ مختلف تعلقہ جات سے ملنے والی رپورٹس کے مطابق کئی رہائشی علاقوں میں برسات اور سیلاب کا پانی بھر گیا ہے۔بہت سی عمارتوں، مکانات، کھیتی باڑی اور باغات کو نقصان پہنچا ہے۔دو ایک جگہ پہاڑی چٹان کھسکنے اور کمپاؤنڈ کی دیواریں گرنے کے واقعات بھی ہوئے ہیں۔ کئی مقامات پر سمندری کٹاؤ بڑھتا جارہا ہے جس کی وجہ سے ان علاقوں میں بسنے والے لوگ خوف و دہشت کا شکار ہوگئے ہیں۔
محکمہ موسمیات کی طرف سے کہا گیا ہے کہ بحیرہئ عرب میں.5 3تا4میٹر اونچی تیزاور طوفانی موجیں اٹھ رہی ہیں۔50تا60کلومیٹر فی گھنٹہ کی رفتار سے ہوائیں چل رہی ہیں۔اس لئے متوقع بھاری برسات اور طوفانی کیفیت کے پیش نظر پورے ساحلی علاقے میں ’آرینج الرٹ‘ جاری کیا گیا ہے۔
جنوبی کینرا کے ڈپٹی کمشنر کی طرف سے تنبیہ کی گئی ہے کہ عوام کسی بھی قیمت پر سمندر اور ندی نالوں کے قریب جانے یا اس میں اترنے کی کوشش ہرگز نہ کریں۔ کمزور اور خطرناک حالت والی عمارتوں، بجلی کے کھمبوں اور درختوں کے نیچے رکنے اور ٹھہرنے سے گریز کریں۔