جنوبی کینرا سے دوسری ریاستوں کو جانے والوں کے لئے جاری کی گئیں ہدایات
منگلورو،3؍ مئی(ایس او نیوز) جنوبی کینرا سے دوسری ریاستوں کو جانے والے مسافروں کے لئے ڈپٹی کمشنر سندھو بی روپیش نے ضلع انتظامیہ کی طرف سے ہدایات جاری کی ہیں، جس کے مطابق سفر کرنے کے خواہشمندافراد کو sevasindhu.karnataka.gov.in نامی ویب سائٹ پر اپنی طرف سے درخواست دے کر رجسٹریشن کرنا ہوگا۔
ڈی سی کی طرف سے جاری کیے گئے بیان میں یہ بھی کہا گیا ہے کہ درخواست گزار چاہے تو اپنے قریبی گرام پنچایت، ٹاؤن میونسپالٹی، سٹی میونسپل کارپوریشن کے دفاتر، تعلقہ آفس، منگلورو کارپوریشن زونل آفس، ناڈاکچیری اور منگلورو وَن کے دفاتر سے بھی رابطہ قائم کرسکتا ہے۔کسی بھی قسم کی مزید معلومات کے لئے ٹول فری نمبر 1077اور وہاٹس ایپ نمبر 9483908000پر فون کیا جائے۔
یہ واضح کیا گیا ہے کہ صرف انہی لوگوں کو جنوبی کنیرا سے سفر کرکے دوسری ریاستوں میں جانے کا موقع دیا جائے گاجن کے اندر کسی بھی قسم کی بیماری کے علامات موجود نہیں ہونگے اور طبی معائنہ لازمی طور پر کیا جائے گا۔سفر کرنے والوں کے لئے ٹرین یا بسوں کا انتظام کیا جائے گا جس کے سفری اخراجات متعلقہ افراد کو ہی برداشت کرنے ہونگے۔سفر کرنے کے خواہشمندوں کو اپنے شناختی دستاویز ساتھ میں رکھنا ضروری ہے۔
اس دوران پتہ چلا ہے کہ سنیچر کے دن ضلع جنوبی کینرا سے 355افراد کے نمونے جانچ کے لئے حاصل کیے گئے اور تمام رپورٹس نگیٹیو آئی ہے۔اسی طرح سنیچر کے دن ’فیور کلینک‘ میں 2,172مریضوں کا علاج کیا گیا جن میں سے 18معاملوں میں سانس کی انتہائی شدید تکلیف کے مرض(SARI)کی تشخیص کی گئی ہے۔