سورتکل میں سابق ایم ایل اے کا مکان سیل ڈاؤن۔ ایک نیشنل سیاسی پارٹی کے دفتر اور دکانوں کوکیاگیا سینیٹائز
سورتکل، 27/جون (ایس او نیوز) سورتکل مضافات کے رکن اسمبلی کا لڑکا کووِڈ سے متاثر پائے جانے کے بعد ان کے گھر کو سیل ڈاؤن کیا گیا ہے۔معلوم ہوا ہے کہ سابق ایم ایل اے کا لڑکابنگلورو میں مقیم تھا۔ جب وہ منگلورو واپس پہنچاتو اس کی جانچ کرنے پر رپورٹ پوزیٹیو آگئی ہے، جس کے بعد اسے وینلاک ہاسپٹل میں داخل کیا گیا ہے۔
بتایا جاتا ہے کہ ان کے گھر کو سیل ڈاؤن کرنے کے علاوہ تمام گھر والوں کے گلے سے تھوک کا نمونہ حاصل کرکے جانچ کے لئے بھیج دیا گیا تھا اور ان سب کی جانچ رپورٹ نگیٹیو آئی ہے۔
خبر یہ بھی ملی ہے کہ مچھلی فروشی کے کاروبار میں مصروف ایک شخص کورونا سے متاثر ہونے کے بعد اسے وینلاک ہاسپٹل میں علاج کے لئے داخل کیا گیا ہے جس کے بعدایک نیشنل پارٹی کے دفتر کو سینیٹائز کیا گیا کیونکہ مذکورہ شخص حال ہی میں اس دفتر میں آیا تھا۔اس کے علاوہ منگلورو کے مختلف علاقوں میں کووِڈ سے بچنے کے احتیاطی اقدام کے طور پر دکانوں او رکامپلیکسس کو سینیٹائز کیا گیا۔