الال ،24؍ مئی (ایس او نیوز) الال کوڈی کے ساحلی کنارے پر گزشتہ کل آدھی رات کو پیش آئے ایک حادثہ میں ماہی گیر کشتی کنارے سے ٹکرا گئی۔

کشتی کے مالک نے بتایا کہ مچھلیاں پکڑنے کے لئے کشتی کو بیچ سمندر میں روکا گیا تھا۔ اس دوران تیز ہوائیں چلنے لگیں اوراس کی رسیاں ٹوٹ گئیں ۔ جس کے بعد کشتی تیز لہروں کے ساتھ  بہہ کر کنارے تک آئی اور ٹکرا گئی۔ اس وقت کشتی پر تملناڈّو سے تعلق رکھنے والے دس مچھیرے موجود تھے، کشتی کنارے سے ٹکراتے ہی وہ سب باہر کود پڑے۔ مقامی لوگوں نے آگے بڑھ کر ان کو محفوظ مقام تک پہنچایا۔ ان میں سے ایک ماہی گیر جو بیمار تھا اس کو اسپتال میں داخل کیا گیا۔ کشتی میں موجود ساز و سامان سمندر میں بہہ گیا۔ 1.2 کروڑ روپے مالیت کی یہ کشتی فاروق اور اشرف  کی ملکیت ہے۔ کنارے سے بار بار ٹکرانے کی وجہ سے کشتی کو نقصان پہنچا ہے۔

سمندری کنارے کے پتھروں میں پھنسی کشتی کو وہاں سے ہٹانے میں بڑی دقت پیش آئی۔ ایم ایل اے یو ٹی قادر نے موقع پر پہنچ کر کشتی ہٹانے کے کام کا جائزہ لیا اور اس میں پیش آرہی مشکل کو دیکھتے ہوئے کرین کی مدد سے کشتی ہٹانے کا فیصلہ کیا گیا۔

الال پولیس نے موقع پر پہنچ کر معائنہ کیا اور کیس درج کرلیا۔