منگلوروضلع کے پانڈیشور میں آگ لگنے سے 7خاندان ہوئے بے گھر
منگلورو 25؍مارچ (ایس او نیوز) پانڈیشور کے دھومپّا کمپاؤنڈ میں آتشزدگی کاایک بڑا واقعہ پیش آیا ہے جس کے نتیجے میں سات خاندان بے گھر ہوگئے ہیں۔ موصولہ رپورٹ کے مطابق آگ لگنے سے جن لوگوں کے گھر جل کر خاکستر ہوگئے ہیں ان کے نام شیکھراچاریہ، کارتیکیان، سودیوان، ہریش گووند، سرینواس، پرکاش اچاریہ اور گنیش اچاریہ بتائے جاتے ہیں۔
معلوم ہوا ہے کہ سنیچر کی رات کو 8بجے کے قریب سب سے پہلے ایک مکان کی چھت سے آگ بھڑکتی دکھائی دی۔ جب تک اسے بجھانے کی تدابیر کی جاتیں تب آگ نے دیگر چھ گھروں کو اپنی لپیٹ میں لے لیا تھا۔فائر بریگیڈ کا عملہ نے موقع پر پہنچ کر تقریباً تین گھنٹوں کی جد وجہد کے بعد آگ پر قابو پالیااور مزید گھروں کو آگ کی زد میں آنے سے بچالیا۔دوسرے دن صبح کے وقت ایک گھر کے اندر پھر سے آگ جلتی ہوئی دکھائی تو مقامی افراد نے دوبارہ فائربریگیڈ کو طلب کیا اور انہوں نے دوبارہ اس مقام پر پہنچ کر آگ کو پوری طرح بجھا دیا۔
کہاجاتا ہے کہ آتشزدگی کا شکارہونے والے تمام خاندان بہت ہی غریب اور مفلس ہیں۔ ان بے گھر افراد کو فی الحال ان کے اپنے رشتے داروں کے یہاں پناہ دی گئی ہے۔منگلورو تحصیلدار گروپرساد اور ولیج اکاؤنتنٹ اویناش نے جائے واردات پر پہنچ کر جائزہ لیا۔ تحصیلدار کا کہنا تھا کہ اتوار کی رات کو قیام کرنے کے لئے ٹاؤن ہال میں تمام انتظامات کیے گئے تھے، مگر کوئی بھی وہاں قیام کرنے کے لئے نہیں پہنچا۔ ان میں سے کچھ لوگ اپنے رشتے داروں کے گھروں پر چلے گئے یا پھر پاس میں موجود ایک خالی مکان میں انہوں نے قیام کیا۔متاثرہ خاندان والوں سے کہا گیا ہے کہ وہ آگ سے ہونے والے نقصانات کی تفصیل تحریری طور پر تحصیلدار کودیں جس کے بعد ولیج اکاؤنٹنٹ اویناش کی طرف سے تحقیق اور رپورٹ تیار کی جائے گی۔
