منگلورو : ہوائی جہاز کا کرایہ چھو رہا ہے آسمان - گلف جانے والے مسافر ہوگئے پریشان
منگلورو ،9؍ نومبر (ایس او نیوز) جو لوگ کووڈ لاک ڈاون کے بعد دوبارہ ہوائی جہاز سے سفر شروع ہونے پر دبئی اور دیگر خلیجی ممالک کی طرف اڑان بھرنا چاہتے تھے ، وہ اب ٹکٹوں کی آسمان چھوتی قیمتوں کی وجہ سے پریشان ہوگئے ہیں ۔
ایک جائزہ بتاتا ہے کہ گزشتہ تین چار دنوں میں دبئی جانے والوں کے لئے ہوائی جہاز کے کرایہ میں 200 فیصد تک اضافہ ہوگیا ہے ۔ مثلاً 6 نومبر منگلورو، بنگلورو اور گوا سے دبئی کا کرایہ 21 ہزار، 22 ہزار، 28 ہزار اور 31 ہزار روپے چل رہا تھا۔ ۔ لیکن 7 نومبر کو اچانک بڑھ کر 38 ہزار روپے اور 8 نومبر کو 50 ہزار روپے ہوگیا ۔
یاد رہے کہ کووڈ وبا اور لاک ڈاون سے پہلے کویت جانے والوں کے لئے ہوائی کرایہ 13ہزار اور اس کے آس پاس ہوا کرتا تھا ۔ اب یہ کرایہ 1.3 لاکھ روپے ہوگیا ہے ۔ اب اگر اتنا بھاری کرایہ ادا کرکے یہ لوگ واپس خلیجی ممالک نہیں جائیں گے تو یقینی طور پر انہیں اپنی نوکریوں سے ہاتھ دھونا پڑے گا ۔ اور اگر جانا چاہیں تو کرایہ کا انتظام کرنا ایک بڑی مصیبت بن کر سامنے آگیا ہے ۔
سمجھا جاتا ہے کہ کووڈ لاک ڈاون کی وجہ سے ہوائی کمپنیوں نے اپنی پروازیں جو بند رکھی تھیں ، اور خسارہ اٹھایا تھا اس کی بھرپائی کا کوئی موقع اپنے ہاتھ سے جانے نہیں دینا چاہتیں ۔ ہوائی کمپنیاں جانتی ہیں کہ لاک ڈاون میں اپنے وطن لوٹنے کے بعد یہاں پھنسے ہوئے افراد کے لئے اب گلف جانا اور اپنی روزی روٹی کے ذرائع پر بحال ہونا انتہائی ضروری ہوگیا ہے ۔اس لئے اب وہ خلیجی ممالک میں اپنی نوکریوں کی فکر میں تڑپ رہے مزدور طبقہ کا خون چوسنے سے بھی گریز نہیں کر رہی ہیں ۔
کچھ ٹراویل ایجنسیوں کا کہنا ہے کہ ہوائی کرایہ میں یہ بڑھوتری کم از کم دو مہینے تک یونہی بنی رہے گی ۔ اس لئے جن لوگوں کو گلف واپس جانے کی کوئی جلدی نہیں ہے وہ لوگ فی الحال اپنا سفر ملتوی کریں اور کرایہ میں کمی آنے کا انتظار کریں تو ہی بہتر ہے ۔
اس سے قبل منگلورو اور اطراف سے خلیجی ممالک جانے والے مسافر اکثر کم کرایہ کی وجہ سے کنور، بنگلورو، کوچی اور گوا وغیرہ سے اڑان بھرنا پسند کرتے تھے ۔ لیکن اب تمام ایئر پورٹس سے ہوائی ٹکٹ مہنگے ہوگئے ہیں اور قیمتیں یکساں طور پر بڑھ گئی ہیں ۔ اس لئے اب مسافروں کے پاس یہ آپشن بھی نہیں رہا ہے ۔