منگلورو:پولیس آفیسر کے خلاف آمدنی سے زیادہ جائداد کا معاملہ ہواثابت۔ عدالت نے سنائی 4سال قیداور 5لاکھ روپے جرمانے کی سزا
منگلورو،27؍اگست (ایس او نیوز) سال 2009میں جب گنگی ریڈی نامی پولیس آفیسر بیلتنگڈی میں سرکل انسپکٹر کے عہدے پر تعینات تھا اس وقت لوک آیوکتہ کے ڈی وائی ایس پی سدانند ورنیکرنے ان کے ٹھکانوں پر چھاپے مارے تھے اور بدعنوانی کے ذریعے اپنی معلوم آمدنی سے زیادہ دولت جمع کرنے کے الزام میں اس پر مقدمہ درج کیاتھا۔ اس وقت ان کی غیر محسوب جائداد کا تخمینہ19لاکھ روپے لگایا گیا تھا۔
اس معاملے کی تحقیقات ڈی وائی ایس پی وٹھل داس پائی کے ذریعے مکمل کرنے کے بعدگنگی ریڈی کے خلاف عدالت میں چارج شیٹ داخل کی گئی تھی۔ منگلورو اسپیشل کورٹ میں اس معاملے کی سماعت کے دوران استغاثہ نے 22گواہوں سے جرح کی۔اسپیشل پبلک پروسیکیوٹر کے ایس این راجیش نے کیس کی پیروی کی۔
تھرڈ ڈسٹرکٹ اینڈ سیشنس کورٹ اور لوک آیوکتہ اسپیشل کورٹ کے جج بی بی جاکٹی نے ملزم پولیس آفیسر کو قصور وار قرار دیتے ہوئے چار سال قید اور پانچ لاکھ روپے جرمانے کی سزا سنائی۔ اور جرمانے کی رقم ادا نہ کرنے کی صورت میں مزید ایک سال اضافی قید کی سزا سنائی گئی ہے۔گنگی ریڈی فی الحال عدالتی تحویل میں ہی ہے۔