منگلورو، 14؍ اکتوبر (ایس او نیوز) اتر پردیش کے ہاتھرس میں دو سال قبل پیش آئے عصمت دری سانحہ کے بعد ہوئے احتجاج کے پس منظر میں گرفتار4 طلبہ کی رہائی کا مطالبہ کرتے ہوئے کیمپس فرنٹ آف انڈیا نے احتجاجی مظاہرہ کیا ۔ 
    
شہر کے کلاک ٹاور کے پاس سے جنوبی کینرا ڈپٹی کمشنر دفتر تک نکالی جانے والی طلبہ کی ریلی کو پولیس نے روکنے کی کوشش کی مگر ریلی آگے بڑھی اور اس کے بعد ڈی سی دفتر کے سامنے دھرنا دیا گیا ۔ اس مظاہرے میں طلبہ نے اتر پردیش حکومت کے خلاف نعرے بازی کی اپنی ناراضی کا اظہار کیا ۔ مظاہرین سے  خطاب کرتے ہوئے  سی ایف آئی کے ریاستی صدر عطاءاللہ پونجالکٹے نے کہا کہ اگر حکومت یہ سمجھتی ہے کہ طلبہ لیڈروں کی گرفتاری سے سی ایف آئی احتجاج کرنا بند کردے گی تو یہ اس کی بے وقوفی  ہے ۔ پولیس کی طرف سے مقدمے، جیل اور لاٹھیوں کی توقع کے ساتھ ہی طلبہ احتجاجی سرگرمیوں میں شامل ہوتے ہیں ۔ اگر جیل میں قید رکھنے سے بزدل ساورکر کی طرح ہم لوگ معافی مانگ کر باہر نکلنے والے نہیں ہیں ۔ ہمیں جتنا روکنے کی کوشش کی جائے گی ہماری رفتار اتنی ہی تیز ہوجائے گی ۔
    
اس موقع پر سی ایف آئی کے ریاستی خزانچی سواد کلرپے، نیشنل جنرل سیکریٹری اشوان صادق کے علاوہ دیگر ذمہ داران اور طلبہ کی بڑی تعداد موجود تھی۔