20 خواتین سے ریپ اینڈ مرڈر کا معاملہ، سائینائیڈ موہن کو 19 ویں معاملے میں بھی ملی عمر قید
منگلور، 18 فروری (آئی این ایس انڈیا) خونخوار سیریل قاتل سائینائیڈ موہن کو کیرالہ کی کاسرگوڈ عدالت نے عمر قید کی سزا سنائی ہے۔موہن نے 2006 میں ایک 23 سالہ خاتون کو قتل کیا تھا، جس پر عدالت نے یہ فیصلہ دیا ہے۔اس شخص نے 20 دیگر خواتین کا بھی قتل کیا ہے جس میں اسے مجرم ٹھہرایا جا چکا ہے۔
سیشن کورٹ کے جج سدنسا نے پیر کو سائینائیڈ موہن کو عمر قید کی سزا سنائی۔مجرم پر 25000 کا جرمانہ بھی لگایا گیا ہے۔دیگر بہت سے معاملات میں بھی یہ شخص عمر قید کی سزا کاٹ رہا ہے۔یہ 20 معاملات میں 19 واں معاملہ ہے، جس میں اسے عمر قید کی سزا سنائی گئی ہے۔ یہ شخص پہلے خواتین سے دوستی کرتا تھا، پھر ان کے ساتھ ریپ کرتا اور سائینائیڈ دے کر مار دیتا تھا۔اس سے پہلے اس مجرم کو 5 مقدمات میں موت کی سزا سنائی گئی ہے،3 معاملات میں اس مجرم کو عمر قید کی سزا سنائی گئی ہے،2 مقدمات میں موت کی سزا کو عمر قید میں تبدیل کر دیا گیا ہے۔
حالیہ کیس کی چارج شیٹ کے مطابق موہن اس وقت خاتون سے ملا تھا جب وہ منگلور میں سی اے ایم پی سی او کے دفتر سے لوٹ رہی تھی۔موہن نے خاتون کو دھوکہ دینے اور شادی کا وعدہ کرنے سے پہلے اس کے ساتھ میسور کے ایک بس اسٹینڈ کے قریب واقع لاج میں 3 جنوری 2006 کو ٹھہرا تھا۔گزشتہ دیگر تمام معاملات کی طرح ہی اگلی صبح موہن نے خاتون سے اس کے تمام زیورات مانگے،وہ اپنے ساتھ خاتون کو کے ایس آرٹی سی بس اسٹینڈ پر لے گیا، پھر اس سے مانع حمل کے بہانے سائینائیڈ کھلا دیا۔ مانع حمل کی گولی میں سائینائیڈ مکس تھا۔خاتون نے واش روم میں سائینائیڈ لیا اور وہیں گر پڑی،پھر خاتون کو ہسپتال لایا گیا، جہاں اسے مردہ قرار دے دیا گیا۔ پہلے معاملات کے طرح موہن اپنے لاڈج میں لوٹ گیا، پھر خاتون کے زیورات کے ساتھ فرار ہو گیا۔اسے 2009 میں بنٹوال سے گرفتار کیا گیا، جس کے بعد اس نے 20 خواتین کے قتل کی بات قبول کی تھی۔
جج نے یہ بھی ہدایت کی ہے کہ ضلع قانونی اتھارٹی اس معاملے میں خاتون کی ماں کی کرناٹک متاثرہ معاوضہ اسکیم کے تحت مدد کرے۔بدنام سیریل کلر سائینائیڈ موہن کا اصلی نام موہن کمار ہے۔سائینائیڈ موہن 1963 میں کرناٹک میں پیدا ہوا تھا۔سائینائیڈ موہن اکثر شادی کا جھانسہ دے کر خواتین کو پھنساتا اور ان کے قتل کرنے کے بعد زیورات لوٹتا تھا۔شادی کا ڈرامہ کرکے خواتین سے تعلق بناتا پھر اگلے دن مانع حمل گولی کھلانے کے بہانے خواتین کو سائینائیڈ پلا دیتا تھا۔سال 2005 سے 2009 کے درمیان سائینائیڈ موہن نے 20 لڑکیوں کو قتل کر دیا تھا۔